राजकोट, ता. १३ : महाराष्ट्राचा अनुभवी फलंदाज ऋतुराज गायकवाडने गुरुवारी झळकावलेल्या ११७ धावांच्या खेळीने सर्वांचे लक्ष वेधले. त्याने केलेल्या धडाकेबाज शतकी खेळीच्या जोरावर भारत अ संघाने दक्षिण आफ्रिका अ संघावर चार विकेट राखून मात केली आणि तीन एकदिवसीय सामन्यांच्या मालिकेत १-० अशी आघाडी घेतली.
दक्षिण आफ्रिका अ संघाकडून भारत अ संघासमोर २८६ धावांचे आव्हान ठेवण्यात आले होते. भारत अ संघासह अभिषेक शर्मा (३१ धावा), तिलक वर्मा (३९ धावा), इशान किशन (१७ धावा), रियान पराग (८ धावा) व नितीशकुमार रेड्डी (३७ धावा) असे स्टार खेळाडू असतानाही ऋतुराज गायकवाड याने दमदार शतक झळकावत आपला ठसा उमटवला. त्याने आपल्या खेळीमध्ये १२ चौकारांचा पाऊस पाडला.
त्याआधी दक्षिण आफ्रिका अ संघाने डियान फॉरेस्टर, डेलानो पॉटगिएटर व बोर्न फोर्चुन यांच्या अर्धशतकी खेळींच्या जोरावर २८५ धावा फटकावल्या. हर्षित राणा, अर्शदीप सिंग यांनी प्रत्येकी दोन फलंदाज बाद केले.
संक्षिप्त धावफलक : दक्षिण आफ्रिका अ - ५० षटकांत ९ बाद २८५ धावा (डियान फॉरेस्टर ७७, डेलानो पॉटगिएटर ९०, बोर्न फॉर्चुन ५९, हर्षित राणा २/४९, अर्शदीप सिंग २/५९) पराभूत वि. भारत अ - ४९.३ षटकांत ६ बाद २९० धावा (ऋतुराज गायकवाड ११७ - १२९ चेंडू, १२ चौकार, अभिषेक शर्मा ३१, तिलक वर्मा ३९, नितीशकुमार रेड्डी ३७, निशांत सिंधू नाबाद २९, बोर्न फॉर्चुन २/५०).