पुणे, ता. १२ ः भरधाव डंपरच्या धडकेत दुचाकीस्वार तरुणाचा मृत्यू झाल्याची घटना नगर रस्त्यावरील खराडी भागात घडली. या प्रकरणी विमानतळ पोलिसांनी डंपरचालकाला अटक केली.
योगेश सत्यवान चौधरी (वय २५, रा. ताराकुंज बिल्डिंग, खराडी गावठाण) असे मृत्युमुखी पडलेल्या दुचाकीस्वार तरुणाचे नाव आहे. या प्रकरणी डंपरचालक परमेश्वर काशिनाथ पवार (वय ३२, रा. कोल्हेवाडी, सिंहगड रस्ता) याला अटक करण्यात आली. पोलिसांनी दिलेल्या माहितीनुसार, दुचाकीस्वार योगेश रविवारी (ता. १०) रात्री साडेअकराच्या सुमारास नगर रस्त्यावरील खराडी भागातून निघाला होता. त्या वेळी भरधाव डंपरने दुचाकीस्वार योगेश याला धडक दिली. अपघातात दुचाकीस्वार योगेश गंभीर जखमी झाला. अपघाताची माहिती मिळताच पोलिसांनी घटनास्थळी धाव घेतली. गंभीर जखमी झालेल्या योगेशला तातडीने रुग्णालयात दाखल करण्यात आले. उपचारांपूर्वीच त्याचा मृत्यू झाला होता. सहायक पोलिस निरीक्षक समीर करपे तपास करत आहेत.