पुणे : जगभरात दरवर्षी आठ मार्चला जागतिक महिला दिन मोठ्या उत्साहात साजरा करत असलो तरी, आजच्या महिला या उपभोगू शकतात का? आणि सर्व महिलांना त्यांचे अधिकार आणि हक्कांबाबत जाणीव आहे का, असा सवाल ज्येष्ठ समाजसेवक डॉ. बाबा आढाव यांनी मंगळवारी (ता.८) समता भूमीत बोलताना केला. या महिला दिनाच्या निमित्ताने महिलांनी त्यांचे हक्क आणि अधिकारांबाबत आत्मपरीक्षण केले पाहिजे, असे प्रतिपादन त्यांनी यावेळी केले.

जागतिक महिला दिनाच्या निमित्ताने मुस्लिम सत्यशोधक मंडळ आणि सत्यशोधक फातिमाबी शेख महिला मंचच्यावतीने महिलांच्या सक्षमीकरणासाठी उपयुक्त ठरू शकणाऱ्या विविध पाच विषयांवरील पथनाट्याचे झोपडपट्यांमध्ये सादरीकरण करण्यात आले. या पथनाट्याचे उद्घाटन डॉ. आढाव यांच्या हस्ते करण्यात आले. त्यावेळी ते बोलत होते. यावेळी मुस्लिम सत्यशोधक मंडळाचे अध्यक्ष डॉ. शमशुद्दीन तांबोळी, कार्यवाह प्रा. जमीर शेख, सहकार्यवाह तमन्ना इनामदार, दिलावर शेख, अल्तापहुसेन नवाब, पथनाट्य सादरीकरण समन्वयक आणि आझम कॅम्पस शिक्षण संस्थेतील प्रा. यास्मीन अत्तार, बुशरा शेख आदी उपस्थित होते.

डॉ. आढाव म्हणाले, ‘‘अमेरिकेतील कामगार महिलांच्या अधिकारासाठी सुरु झालेल्या चळवळीच्या माध्यमातून जागतिक महिला दिनाच्या संकल्पनेचा उदय झालेला आहे. परंतु ज्या संकल्पनेतून या दिनाची सुरवात झाली, त्या दिनाचा उद्देश खरोखरच सफल होतो आहे का, हे तपासून पाहण्याची गरज निर्माण झाली आहे. भारतात आणि महाराष्ट्रात आजही महिलांना केवळ कागदोपत्री अधिकार मिळाल्याचे चित्र दिसते आहे. हे अधिकार महिला खरंच उपभोगू शकतात का, याचे आत्मपरीक्षण करण्याची वेळ आली आहे.’’

आझम कॅम्पस शिक्षण संस्थेतील ५० विद्यार्थींनीनी विविध विषयांवरील पाच पथनाट्य तयार करून त्यांचे सादरीकरण केले. प्रत्येक पथनाट्यात प्रत्येकी दहा विद्यार्थिनींनी सहभाग घेतला. ही पथनाट्य महिलांचे अधिकार, महिला सबलीकरण, बालकामगार, सामाजिक स्वास्थ आणि महिला आरोग्य या पाच विषयांवर सादर करण्यात आली. डॉ. आढाव यांनी या विद्यार्थीनींशी प्रश्‍नोत्तरे स्वरूपात संवाद साधला. अध्यक्ष डॉ. शमशुद्दीन तांबोळी यांनी प्रास्ताविक केले.