मुंबई : भांडवल बाजार नियामक ‘सेबी’ने देशातील म्युच्युअल फंडाच्या व्यवस्थापकांना गुंतवणूकदारांना स्मॉल आणि मिड-कॅप फंडांशी संबंधित जोखमींबद्दल अधिक माहिती देण्यास सांगितले आहे.

लहान आणि मध्यम आकाराच्या फंडांमध्ये मोठी गुंतवणूक होत असल्याचे दिसून आले आहे, ज्यामुळे बाजारात विक्रीचा मारा झाल्यास फंडांतील गुंतवणूक कशी टिकून राहील, याबद्दल फंड अधिकाऱ्यांमध्ये चिंता निर्माण झाली आहे. ‘सेबी’देखील अशा फंडांद्वारे आयोजित केलेल्या ताण चाचण्यांचे पुनरावलोकन करत आहे, असेही सुत्रांनी म्हटले आहे.

मोठ्या प्रमाणात गुंतवणूक बाहेर पडल्यास पोर्टफोलिओच्या मूल्यावर काय परिणाम होऊ शकतो आणि त्याची पूर्तता करण्यासाठी फंडाकडे किती रोख आणि तरल मालमत्ता आहे याचा खुलासा करण्यास फंड कंपन्यांना सांगितले जात आहे, असे सुत्रांनी सांगितले.