Vodafone Idea News : ‘व्होडा-आयडिया’ उभारणार ४५ हजार कोटी

नवी दिल्ली : आर्थिक अडचणीत सापडलेली दूरसंचार कंपनी व्होडाफोन आयडियाने शेअर आणि कर्ज रोखे आदी पर्यायांच्या माध्यमातून ४५ हजार कोटी रुपयांचा निधी उभारण्याची योजना आखली आहे.

त्यापैकी शेअर आणि संबंधित पर्यायांद्वारे २० हजार कोटी रुपयांचा निधी उभारण्याच्या प्रस्तावाला कंपनीच्या संचालक मंडळाने आज मान्यता दिली. कंपनीचे प्रवर्तकदेखील यात सहभागी होणार आहेत, असे कंपनीने सांगितले.

व्होडाफोन आयडिया कंपनी अस्तित्वासाठी संघर्ष करत असून, तिच्यावर २.१ लाख कोटी रुपयांचे कर्ज आहे. कंपनीच्या ग्राहकांमध्येही घसरण होत आहे. कंपनीच्या संचालक मंडळाने २० हजार कोटी रुपयांचा निधी उभारण्यासाठी बँकर व अन्य अधिकाऱ्यांची नियुक्ती करण्यासाठी व्यवस्थापनाला परवानगी दिली आहे.

कंपनी दोन एप्रिल २०२४ रोजी भागधारकांची बैठक बोलावणार असून, त्यांनी मंजुरी दिल्यानंतर तिमाहीत निधी उभारणी पूर्ण करेल, असेही कंपनीने म्हटले आहे. याशिवाय, कंपनी कर्ज मिळविण्यासाठी सातत्याने प्रयत्न करत आहे. सध्या कंपनीचे बँकाकडून घेतलेले कर्ज ४,५०० कोटी रुपयांपेक्षा कमी आहे. शेअर आणि कर्ज रोख्यांच्या माध्यमातून उभारण्यात येणाऱ्या निधीमुळे कंपनीला फोर-जी कव्हरेज, फाइव्ह-जी नेटवर्क उपलब्ध करणे आणि क्षमता विस्तारासाठी लक्षणीय गुंतवणूक करता येईल. ग्राहकांना चांगला अनुभव देता येईल, असेही कंपनीने म्हटले आहे.