कऱ्हाड : येथील गजानन हौसिंग सोसायटीतील मोटारसायकल रायडरचा वाराणसी (उत्तर प्रदेश) येथे अपघाती मृत्यू झाल्याची घटना गुरुवारी पहाटे घडली. या घटनेने परिसरात शोककळा पसरली आहे. तेजस संजय पाटील (वय ३२) असे त्यांचे नाव आहे.

येथील गजानन सोसायटीतील तेजस पाटील हे मोटारसायकल रायडर (Bike Rider) आहेत. वर्षातून एकदा मोटारसायकल प्रवासाला ते जातात. ३० नोव्हेंबरला त्यांचे मित्र वैभव गोडगे (चौंडेश्र्वरी नगर- गोवारे), अजय देशमुख (वाखाण, कऱ्हाड) व हर्षवर्धन थोरात (कार्वे) यांच्यासमवेत मोटारसायकल रायडिंगसाठी ते कऱ्हाडमधून निघाले.

सुरुवातीला उज्जैन, त्यानंतर अयोध्या येथे ते गेले. त्यानंतर त्यांनी नेपाळ (Nepal) गाठले. तेथे फिरल्यानंतर ते सिक्कीमला आले. तेथून त्यांचा परतीचा प्रवास सुरू झाला. कऱ्हाडला परतत असताना ते वाराणसी येथे गेले. बुधवारी वाराणसीत फिरल्यानंतर गुरुवारी पहाटे पाचच्या सुमारास होणाऱ्या घाटावरील काकड आरतीसाठी तेजस स्वतःची मोटारसायकल घेऊन गेले. अन्य तिन्ही मित्र प्रवासाचा कंटाळा आल्याने झोपले होते.

मात्र, वाराणसीतील एका चौकात भरधाव आलेल्या डंपरने तेजस यांच्या मोटारसायकलला जोराची धडक दिली. त्यात त्यांचा जागीच मृत्यू झाला. त्याबाबतची माहिती संबंधित पोलिसांनी त्यांच्या मित्रांना दिली. त्यानंतर येथे माहिती देण्यात आली. त्यांचे बंधू हर्ष‌वर्धन पाटील तातडीने वाराणसीला रवाना झाले.

काल रात्री मृतदेह घेऊन ते येथे आले. त्यानंतर रात्री उशिरा तेजस यांच्यावर अंत्यसंस्कार झाले. दरम्यान, तेजस यांच्या मागे पत्नी, दोन मुली, आई, भाऊ, बहीण, चुलता- चुलती असा परिवार आहे. तेजस यांच्या अपघाती निधनाने परिसरात शोककळा पसरली आहे.