कऱ्हाड : स्वराज्य रक्षक हा अजित पवार (Ajit Pawar) यांचा शब्द बरोबर आहे. परंतु, छत्रपती संभाजी महाराज हे स्वराज्य विस्तारक आणि कडवे हिंदू धर्मवीर होते. अजितदादांनी स्वराज्य रक्षक शब्दाबरोबर धर्मवीर संभाजी महाराज असं म्हटलं तर ते महाराष्ट्रातीलच नव्हे तर देशातील जनतेला आवडेल. तेवढा अजितदादांनी वैचारिक मोठेपणा दाखवावा, असं मत बाळासाहेबांची शिवसेना गटाचे आमदार शहाजीबापू पाटील (Shahajibapu Patil) यांनी इथं व्यक्त केलं.

कऱ्हाड (जि. सातारा) येथील एका खासगी कार्यक्रमानिमित्त आमदार शहाजीबापू पाटील आले होते. त्यावेळी त्यांनी माध्यमांशी संवाद साधला. छत्रपती संभाजी महाराज (Chhatrapati Sambhaji Maharaj) यांना धर्मवीर व स्वराज्य रक्षक म्हणण्यावरून सध्या राज्यात वाद निर्माण झाला आहे. यावरून विरोधी पक्षनेते अजित पवार यांनी स्वराज्य रक्षक हेच बरोबर आहे. धर्मवीर नव्हे तर स्वराज्य रक्षक या शब्दावर ठाम असल्याचं म्हटलं होतं. त्यावरून शहाजीबापू यांनी आपली प्रतिक्रिया दिलीये.

शहाजीबापू म्हणाले, स्वराज्य रक्षक हा अजित पवार यांचा शब्द बरोबर आहे. परंतु, छत्रपती संभाजी महाराज हे स्वराज्य विस्तारक आणि कडवे हिंदू धर्मवीर होते. अजितदादांनी स्वराज्य रक्षक शब्दाबरोबर धर्मवीर संभाजी महाराज असं म्हटलं तर ते महाराष्ट्रातीलच नव्हे तर देशातील जनतेला आवडेल. तेवढा अजितदादांनी वैचारिक मोठेपणा दाखवावा, असं त्यांनी नमूद केलंय.

'वीज कर्मचाऱ्यांवर अन्याय होणार नाही'

मुख्यमंत्री एकनाथ शिंदे आणि उपमुख्यमंत्री देवेंद्र फडणवीस सरकारची धोरणं ही लोकहिताची आहेत, असं सांगून आमदार पाटील म्हणाले, 'महाराष्ट्रातील वीज कर्मचाऱ्यांवर कोणताही अन्याय होणार नाही. अशा पध्दतीचं धोरण आखलेलं आहे. जे धोरण सरकारनं स्वीकालेलं आहे, ते महाराष्ट्र राज्याच्या फायद्याच आहे.'