सातारा : पुणे येथील कुख्यात गुंड गजा मारणे याच्या सातारा पोलिसांनी जावळी तालुक्‍यातील मेढा परिसरातून आज सायंकाळी मुसक्‍या आवळल्या. याबाबत पोलिस अधीक्षक अजयकुमार बन्सल यांच्याशी संपर्क साधला असता त्यांनी अधिक तपशील सांगण्यास अजून वेळ लागेल, अशी प्रतिक्रिया दिली. 

खून केल्याच्या गुन्ह्यात येरवडा कारागृहात असणारा पुणे येथील कुख्यात गुंड गजा मारणे याची सात वर्षांनंतर सुटका झाली होती. यानंतर त्याच्या समर्थकांनी मारणे याची मोठी रॅली काढली होती. या रॅलीबाबत प्रश्न निर्माण झाल्यानंतर पुणे पोलिसांनी मारणे विरोधात गुन्हा नोंद केला होता. या गुन्ह्यात मारणे याने पोलिसांना अंधारात ठेऊन पुणे जिल्हा न्यायालयातून जामीन मिळवला होता. जामीन मिळाल्यापासून मारणे हा गायब झाला होता. याच काळात दुकानावर येऊन वडापाव आणि पाण्याच्या बाटल्या जबरदस्तीने नेल्याची फिर्याद एका विक्रेत्याने पुणे पोलिसांकडे नोंदवली होती. हा गुन्हा दाखल झाल्यापासून मारणे हा फरारी होता. 

खून, मारामारी, घरफोडीतील 18 गुंड तडीपार; साताऱ्यात पोलिस अधीक्षकांची 4 टोळ्यांवर धडाकेबाज कारवाई

यानंतर गृहमंत्री अनिल देशमुख यांनी राज्यातील पोलिस दल अलर्ट केले होते. फरारी असणाऱ्या मारणे याचा शोध सुरू केला होता. फरारी असणारा मारणे साथीदारांसमवेत मेढा भागात असल्याची माहिती सातारा पोलिसांना मिळाली. यानुसार त्यांनी मेढा चौकात तपासणी सुरू केली. तपासणीदरम्यान पोलिसांनी एक चारचाकी अडवली त्यात चार माणसे होती. त्यांना ताब्यात घेतले असता एका व्यक्तीचे वर्णन मारणे याच्याशी जुळत होते. त्या गाडीतून दीड लाखाची रोकडसुद्धा जप्त करण्यात आली आहे. ताब्यात घेतलेल्या चारपैकी एक जण मारणे यांच्यासारखा दिसत असल्याने केलेल्या चौकशीत त्याने स्वतः गजा मारणे असल्याचे सांगितले. त्याने सांगितल्यानुसार शहानिशा करण्याचे काम रात्री उशिरापर्यंत पोलिसांकडून सुरू होते. याबाबत अधीक्षक अजयकुमार बन्सल यांच्याशी संपर्क साधला असता माहिती देण्यास वेळ लागेल, असे सांगितले. 

साताऱ्याच्या बातम्या वाचण्यासाठी येथे ► क्लिक करा

संपादन : बाळकृष्ण मधाळे