सातारा : खटाव तालुक्यातील पुसेसावळी (Pusesawali Riots) इथं समाज माध्यमांवर आक्षेपार्ह पोस्ट टाकल्यानंतर रविवारी (ता. 10) रात्री उशिरा जाळपोळीची घटना घडली. या घटनेत एकाचा मृत्यू झाला असून 10 जण जखमी झाले आहेत.

या घटनेमुळं परिसरात प्रचंड तणाव निर्माण झाला असून स्थानिक पोलिस प्रशासनानं परिस्थिती नियंत्रण आणली होती; परंतु परिसरातून मोठ्या प्रमाणावर युवक जमा झाल्याने परिस्थिती हाताबाहेर गेली. सातार्‍यातून तातडीनं पोलिस कुमक आल्याने जमाव पांगवण्यात पोलिसांना यश आलं आहे.

या दंगलीच्या पार्श्वभूमीवर सातारा जिल्ह्यात 72 तासांसाठी इंटरनेट सेवा (Internet Service) बंद करण्यात आली आहे. पुसेसावळीत दंगल भडकल्‍यानंतर याची माहिती सातारा पोलिस दलानं गृह विभागास दिली. गृह विभागानं खबरदारी म्‍हणून जिल्ह्यातील इंटरनेट सेवा बंद करण्‍याच्‍या सूचना संबंधित कंपन्‍यांना केल्‍या. यानुसार बुधवारी (ता. १३) मध्‍यरात्री १२ पर्यंत जिल्‍हाभरातील इंटरनेट सेवा बंद राहणार आहे.

तणावानंतर शाळांना सुटी

दंगलीमुळं निर्माण झालेल्‍या तणावानंतर सातारा शहर व जिल्ह्यातील शाळा, महाविद्यालयांनी खबरदारीचा उपाय म्‍हणून सोमवारी शैक्षणिक कामकाज दुपारनंतर थांबवण्‍याचा निर्णय घेतला. इंटरनेट बंद असल्‍याने शाळेतील शिक्षकांनी या निर्णयाची माहिती फोनद्वारे पालकांना देत मुलांना नेण्‍याच्‍या सूचना केल्‍या. यामुळे दुपारनंतर अनेक शाळा, महाविद्यालयांच्‍या आवारात पालकांची मोठी गर्दी झाली होती.