औंध (जि. सातारा) : विहिरीतील पाण्याच्या वाटपावरून भावाने डोक्‍यात काठी मारल्याने सख्या भावाचा मृत्यू झाला. या वेळी वडिलांनीही मुलाला मारहाणा केली. भाऊसाहेब पांडुरंग माने (वय 49, रा. म्हासुर्णे, ता. खटाव) असे मृताचे नाव आहे. याप्रकरणी संजय पांडुरंग माने (वय 46) याला ताब्यात घेतले आहे. 

पोलिसांनी दिलेल्या माहितीनुसार, गुरुवारी (ता. 11) सायंकाळी सात वाजण्याच्या सुमारास खैरवाडा शिवारात भाऊसाहेब हे विहिरीच्या पाण्याच्या वाटपासंदर्भात विचारायला गेल्यानंतर संजय पांडुरंग माने यांच्याशी त्यांचा वाद झाला. या वेळी संजय यांनी भाऊसाहेब यांना काठीने मारहाण केली. भाऊसाहेब यांचे वडील पांडुरंग देवबा माने यांनीही त्यांना लाथाबुक्‍क्‍यांनी मारहाण केली. त्यात भाऊसाहेब हे बेशुद्ध पडले. या वेळी अन्य काहींनी भांडणे सोडविण्याचा प्रयत्न केला; परंतु दोघांनी सर्वांना हाकलून लावले. 

फलटण-सातारा मार्गावर ट्रकचालकांना लूटणाऱ्या उस्मानाबादच्या पाच जणांना पोलिस कोठडी

मायणी येथील प्राथमिक आरोग्य केंद्रात उपचार केल्यानंतर त्यांना वडूज येथील ग्रामीण रुग्णालयात दाखल करण्यास सांगण्यात आले. मात्र, रात्री उशीर झाल्याने कुटुंबीयांनी त्यांना घरी नेले. त्यानंतर भाऊसाहेब यांना रात्रभर रक्ताच्या उलट्या झाल्या. नातेवाईकांनी त्यांना आज सकाळी वडूजच्या ग्रामीण रुग्णालयात दाखल केले. तेथून त्यांना साताऱ्यातील जिल्हा शासकीय रुग्णालयात हलविण्यात आले. मात्र, उपचारापूर्वीच त्यांचा मृत्यू झाला होता. याप्रकरणी संजय माने व पांडुरंग माने या बापलेकाविरुद्ध वडूज पोलिस ठाण्यात गुन्हा दाखल करण्याची प्रक्रिया रात्री उशिरापर्यंत सुरू होती. 

साताऱ्याच्या बातम्या वाचण्यासाठी येथे ► क्लिक करा

संपादन : बाळकृष्ण मधाळे