रेठरे बुद्रुक (जि. सातारा) : रेल्वे विभागाने (Railway Ministry) शेणोली स्टेशनला (Shenoli Station) दुहेरीकरण व विद्युतीकरणाच्या पायलट प्रकल्पातून सोनेरी झळाळी दिली आहे. केंद्रीय रेल्वे मंत्रालयाने मिरज-पुणे लोहमार्ग (Miraj Pune) दुहेरीकरण व विद्युतीकरणाची मुहूर्तमेढ शेणोलीला रोवली असतानाच त्या स्टेशनला मात्र एक्‍स्प्रेस गाड्या थांबण्याची प्रतीक्षाच आहे. "कोयना' व "महाराष्ट्र' एक्‍स्प्रेसला (Koyna Express) (Maharashtra Express) थांबा मिळण्यासाठी परिसरातील नागरिकांचा सात वर्षांपासून पाठपुरावा सुरू आहे. मात्र, वरिष्ठ पातळीवर त्यांच्या या मागणीस दाद मिळत नाही. त्यामुळे एक्‍स्प्रेस थांब्याला रेल्वेकडून ग्रीन सिग्नलच मिळेना झाला आहे. (satara marathi news shenoli railway station express train stop)

कऱ्हाड व सांगली जिल्ह्यांतील वाळवा, कडेगाव तालुक्‍यांतील सुमारे 25 गावांना शेणोलीचे रेल्वे स्टेशन मध्यवर्ती आहे. अनेक बाजूंनी उपयोगी राहणाऱ्या या स्टेशनला केवळ पॅसेंजर गाडी थांबते. हे स्टेशन बाजारपेठ व राष्ट्रीय महामार्गानजीक असणारे आहे. रेल्वेने लोहमार्ग दुहेरीकरण व विद्युतीकरणास शेणोलीपासून प्रारंभ केला. त्यासाठी स्टेशनवर सर्व सोयी केल्या आहेत. स्टेशनवर सकाळी व रात्रीची पॅसेंजर तेथे थांबते. त्यातून दरवर्षी 15 लाख रुपयांचा महसूल रेल्वेस मिळतो.

सातारा जिल्ह्यातील बातम्या वाचण्यासाठी क्लिक करा

तेथून जवळच्या यशवंतराव मोहिते कृष्णा साखर कारखाना व सोनहिरा साखर कारखाना, कृष्णा महाविद्यालय, कृष्णा कृषी महाविद्यालय, जयवंतराव भोसले अभियांत्रिकी महाविद्यालय त्यातील विद्यार्थी, कर्मचारी रेल्वेतून ये-जा करतात. पॅसेंजरपेक्षा एक्‍स्प्रेसमधून प्रवास करणे सोयीचे ठरते. त्यामुळे 2014 मध्ये परिसरातील नागरिकांनी एक्‍स्प्रेस थांबवण्यासाठी प्रयत्न केले. तत्कालीन रेल्वेमंत्री सुरेश प्रभूंनी त्याला ग्रीन सिग्नल दिला. मात्र, कार्यवाही झाली नाही. सध्या या स्टेशनचे रुपडे पालटले आहे. स्टेशन सोनेरी झालर पांघरून तयार असतानाही या स्टेशनला एक्‍स्प्रेस थांबण्याची प्रतीक्षाच आहे.

रेल्वेला मिळणाऱ्या महसुलाचा विचार करून शेणोलीस एक्‍स्प्रेस थांबणे गरजेचे आहे. 2014 पासून आम्ही त्यासाठी पाठपुरावा करत आहोत. खासदार श्रीनिवास पाटील यांनी पाठपुरावा केल्यास तो प्रश्न मार्गी लागेल.

- पांडुरंग सूर्यवंशी, प्रवासी, शेणोली