सातारा : केंद्र सरकारच्या सेन्ट्रल रोड फंड योजनेतून जिल्ह्यातील विविध मार्गांची कामे मार्गी लावावीत, अशी विनंती खासदार उदयनराजे भोसले यांनी केंद्रीय रस्ते वाहतूक आणि महामार्गमंत्री नितीन गडकरी यांच्याकडे भेटीअंती केली. या वेळी मागणीनुसार जिल्ह्यास जास्तीत जास्त निधी अर्थसंकल्पाच्या माध्यमातून देण्याचे आश्‍वासन श्री. गडकरी यांनी उदयनराजे यांना दिले. 

पाटण, जावळी, महाबळेश्‍वर, कऱ्हाड शहर, कऱ्हाड तालुका, कोरेगाव, रहिमतपूर, पाचगणी, पुसेगाव, वडूज, कातरखटाव, पाचवड फाटा परिसरातून जाणाऱ्या प्राथमिक आणि राज्यमार्गांची दुरवस्था झाली असून, त्यांचे रुंदीकरण तसेच सुधारणा आवश्‍यक आहे. या मार्गांवरील शहरांना रुंदीकरणाचा फटका बसू नये, यासाठी अनेक ठिकाणी रिंगरोड करणे आवश्‍यक आहे. या मार्गांची माहिती संकलित करत त्यासाठीचा निधी केंद्र शासनाकडून मिळावा, यासाठीचे निवेदन खासदार उदयनराजे यांनी नुकतेच दिल्ली येथे केंद्रीय रस्ते वाहतूकमंत्री गडकरी यांना दिले. 

राजकारण बाजूला ठेऊन साताऱ्याला भरघोस निधी देणार; मंत्री चव्हाणांची उदयनराजेंना ग्वाही

जिल्ह्यातील रस्ते विकासासाठी यापूर्वी वेळोवेळी रस्ते सुधारणांसाठी श्री. गडकरी यांनी केंद्रातून निधी उपलब्ध करून दिला आहे. पोवई नाका येथील ग्रेड सेपरेटरसाठी श्री. गडकरी आणि तत्कालीन मुख्यमंत्री देवेंद्र फडणवीस यांनी निधी दिला होता. या निधीतून ग्रेड सेपरेटरचे काम पूर्ण झाले आहे. आगामी काळात श्री. गडकरी यांनी सेंट्रल रोड फंडमधून जिल्ह्याला झुकते माप देण्याची मागणी या वेळी उदयनराजेंनी केली. मागणी करतानाच त्यांनी जिल्ह्यातील रस्त्यांची तसेच इतर नवीन कामांचा प्रस्ताव श्री. गडकरी यांना दिला. यानुसार आगामी काळात जास्तीत जास्त निधी अर्थसंकल्पाच्या माध्यमातून देण्याचे आश्‍वासन मंत्री गडकरी यांनी उदयनराजेंना दिले. 

साताऱ्याच्या बातम्या वाचण्यासाठी येथे ► क्लिक करा

संपादन : बाळकृष्ण मधाळे