सातारा : विरमाडे (ता. वाई) येथील सैन्यदलात कमांडंट कर्नल या पदावर कार्यरत दुष्यंत सोनावणे यांना सेना मेडल जाहीर झाले आहे. श्री. सोनावणे यांना जाहीर झालेल्या या पदकामुळे विरमाडेच्या शिरपेचात मानाचा तुरा रोवला गेला आहे. दरम्यान, सैन्यदलात मेजर या पदावर कार्यरत सातारा येथील रोहित भोसले यांनाही सेना मेडल जाहीर झाले असून, जिल्ह्यातील या दोन सुपुत्रांमुळे सातारा जिल्ह्याचीही शान उंचावली आहे. विशेष म्हणजे सोनावणे आणि भोसले हे दोघेही सातारा सैनिक स्कूलचे विद्यार्थी आहेत. 

16 पंजाब पातियाळाचे कमांडंट कर्नल श्री. सोनावणे यांनी ऑपरेशन स्नो लेपर्डमध्ये अतिशय उल्लेखनीय नेतृत्व करत आपल्या टीमची चमक दाखवून दिल्यामुळे त्यांना सेना मेडल जाहीर झाले आहे. 24 मराठा लाइट इन्फंट्रीमध्ये कार्यरत मेजर श्री. भोसले हे जम्मू-काश्‍मीर येथील नौसेरा सेक्‍टर येथे कार्यरत आहेत. 28 ते 31 मे 2020 या कालावधीत भारतीय सीमेवर लाइन ऑफ कंट्रोलमध्ये झालेल्या चकमकीत त्यांच्या टीमने अतिरेक्‍यांना कंठस्नान घातले. 

Hows The Josh! निपाणीच्या पोरीनं जिंकलं दिल्लीचं तख्त; सुप्रियाची सैन्य दलात फिनिक्स भरारी

अतिशय अवघड आणि कठीण प्रसंगांचा सामना करत त्यांच्या टीमने ही मोहीम फत्ते केली होती. त्याची दखल भारतीय लष्कराने घेतली आहे. दरम्यान, विरमाडे ग्रामपंचायतीचे नवनिर्वाचित सदस्य तुषार सोनावणे, खरेदी-विक्री संघाचे संचालक राजेंद्र सोनावणे तसेच गावातील ग्रामस्थांनी श्री. सोनावणे यांचे अभिनंदन करून त्यांना शुभेच्छा दिल्या. 

साताऱ्याच्या बातम्या वाचण्यासाठी येथे ► क्लिक करा

संपादन : बाळकृष्ण मधाळे