सध्या जगात सगळीकडे एआयची चर्चा सुरू आहे. आर्टिफिशिअल इंटेलिजन्सबाबत सर्वांनी ऐकलं असलं, तरी त्याची परिपूर्ण माहिती बहुतांश लोकांना नाही. यामुळेच अमेझॉन कंपनी आता जगभरातील 20 लाख लोकांना एआय प्रशिक्षण देण्याच्या तयारीत आहे. यासाठी अमेझॉनने 'एआय रेडी' अभियानाची घोषणा केली आहे.

एआय रेडी अभियानात विविध प्रकारचे एआय टूल्स आणि कोर्सेस शिकवण्यात येणार आहेत. यामध्ये 8 मोफत एआय आणि जनरेटिव्ह एआय कोर्सेसचा समावेश आहे. यासोबतच, कंपनी लोकांना स्कॉलरशिप देखील देणार आहे. तसंच, विविध प्लॅटफॉर्मसोबत यासाठी कोलॅबरेशन करण्यात येईल. फायनॅन्शिअल एक्स्प्रेसने याबाबतचं वृत्त प्रसिद्ध केलं आहे.

नोकरीमध्ये होणार फायदा

सध्या जगभरातील वर्कप्लेसमध्ये 'एआय रेडी', म्हणजेच एआयची माहिती असणाऱ्या कर्मचाऱ्यांची मागणी वाढली आहे. AWS (अमेझॉन वेब सर्व्हिसेस) संस्थेने केलेल्या सर्व्हेमध्ये असं दिसून आलं आहे, की जवळपास 73 टक्के कंपन्या अशा कर्मचाऱ्यांना प्राधान्य देत आहेत, ज्यांना एआय बाबत माहिती आहे. एआयचं ज्ञान असणाऱ्या कर्मचाऱ्यांना इतरांपेक्षा 47 टक्के अधिक पगार मिळत असल्याचंही या सर्वेक्षणात स्पष्ट झालं आहे. (Tech News)

कंपनीची मोठी गुंतवणूक

अमेझॉन या एआय रेडी अभियानासाठी तब्बल 12 मिलियन डॉलरपेक्षा अधिक गुंतवणूक करणार आहे. 2025 सालापर्यंत किमान 20 लाख लोकांना एआय-साक्षर बनवण्याचं कंपनीचं लक्ष्य आहे.