देशातील वेगवेगळ्या भागात 15 जानेवारी 2024 रोजी मकर संक्रांतीचा सण उत्साहात साजरा करण्यात आला. वेगवेगळ्या राज्यांमध्ये लोक हा सण वेगवेगळ्या नावांनी ओळखतात आणि साजरा करतात. गुजरातमध्ये उत्तरायण म्हणून हा सण ओळखला जातो.

दरम्यान गुजरातमधील उतरायण निमीत्त आयोजित पतंग उत्सवादरम्यानच्या एका व्हायरल व्हिडिओने सर्वांचे लक्ष वेधून घेतलं आहे. या पतंग मोहत्सवादरम्यान एकाने देशाचे गृहमंत्री अमित शाह यांचा पतंग कापल्याचा व्हिडीओ सध्या तुफान व्हायरल होतो आहे.

व्हिडीओमध्ये काय आहे?

सोशल मीडियावर व्हायरल होत असलेल्या व्हिडिओमध्ये एक व्यक्ती घराच्या छतावरून पतंग उडवताना दिसत आहे. अचानक दुसऱ्याचा पतंग कापल्यानंतर तो आनंदाने ओरडू लागतो. जेव्हा कॅमेरा दुसऱ्या इमारतीच्या टेरेसकडे वळवला जातो तेव्हा तिथे देशाचे गृहमंत्री अमित शाह दिसतात. यानंतर तो व्यक्ती गुजराती भाषेत सांगतो की, त्याने गृहमंत्री अमित शाह यांचा पतंग कापला. त्या व्यक्तीचा आनंद पाहून अमित शाहाही हसताना दिसतात. हा व्हिडिओ सोशल मीडियावर व्हायरल होत आहे.

हा व्हिडिओ सोशल मीडिया प्लॅटफॉर्म एक्स (पूर्वीचे ट्विटर) वर @RVCJ_FB नावाच्या हँडलवरून शेअर करण्यात आला आहे. हा व्हिडिओ आतापर्यंत लाखो लोकांनी पाहिला आहे. व्हिडिओ पाहिल्यानंतर लोक याच्या कमेंटमध्ये व्यक्त होताना दिसत आहे. लोकांनी अनेक मजेशीर कमेंट्स देखील केल्या आहेत. एका यूजरने तुम्ही फक्त मुलांच्या खेळात पराभूत होऊ शकता अशी कमेंट केली आहे. तर दुसऱ्या एका युजरने काँग्रेसचे लोक या व्यक्तीला निवडणुकीत तिकीट देण्यासाठी शोधत असतील अशी मजेशीर टिप्पणी केलीय.