Dhule Crime News : पैशांच्या वादातून मोहाडी शिवारातील मुंबई-आग्रा महामार्गावरील सर्व्हिस रोडलगत, महामार्ग पोलिस चौकीजवळ सोमवारी (ता. १९) दुपारी दोन गटांत धुमश्चक्री उडाली. तलवार, पाइप, लोखंडी रॉड, अँगल, चॉपर, हॉकी स्टीक, बेसबॉलचा दांडा, चेन व्हील रॉडचा वापर झाला. त्यात आठ जण जखमी झाले. परस्परविरोधी तक्रारीवरून २० ते २२ जणांवर मोहाडी पोलिस ठाण्यात गुन्हा दाखल झाला. (8 people were injured in clash between 2 groups)

आमिन इक्बाल अन्सारी (वय ३८, रा. वडजाई रोड, काझी प्लॉट, धुळे) याच्या फिर्यादीनुसार अख्तर कल्लू खान, सदाम नगरसेवक, कल्लू खवड्या, अन्वर कल्लू खान, सदाम नगरसेवकचा भाऊ पापा व अहमद खान (सर्व रा. जामचामळा) हे हत्यारांसह एकत्र आले.

त्यातील अख्तर खान याने शिवीगाळ करीत ‘कायके पैसे तुम्हारे, हम तुमको पैसे नही देंगे’, असे बोलून तलवारीने ठार मारण्याच्या उद्देशाने अंगावर धावून येत डोक्याच्या डाव्या बाजूला, कानावर, तसेच कपाळावर व डाव्या हाताच्या पंज्याला, दोन्ही पायांवर वार केले.

तसेच शरीफ शहा सलीम शाह, तन्वीर सिराजुद्दीन शेख, शाहरुख शाह, तसेच सोहेल आरिफ शाह यांनादेखील गर्दी करीत तलवार, चक्री पाइप, लोखंडी पाइप, चॉपर, लोखंडी अँगल, सळईने ठार मारण्याच्या उद्देशाने बेदम मारहाण केली. शिवीगाळ करून ठार मारण्याची धमकी दिली.

त्यावरून संबंधित सहा जणांवर गुन्हा दाखल झाला. परस्परविरोधात इबरार मोहम्मद हुसेन (वय २३, रा. जामचामळा) याच्या फिर्यादीनुसार आमिन इक्बाल अन्सारी, शरीफ सलीम शाह, तन्वीर सिराजुद्दीन शेख, सोहेल आरिफ शाह, शाहरुख शाह (सर्व रा. बाबानगर, धुळे), साबीर शाह (रा. चाळीसगाव) व अन्य दहा ते बारा जणांनी अख्तर याच्या मुस्कान ट्रेडर्सच्या ऑफिस व गुदामासमोरील मोकळ्या जागेत एकत्र येत शिवीगाळ केली.

‘सब दुकाने बंद करो, तुम सबको मस्ती चढ गयी है. यहाँ एक भी दुकान नही चलेगी, तुम सब बाहरवाले हो. अगर यहाँ धंदा करना है, तो पैसा देना पडेगा’, असे अख्तर याला पाहून शिवीगाळ केली.

तेव्हा अख्तर याने तुम्ही मला शिवीगाळ करता व तुम्हाला कशाचे पैसे व का द्यायचे, असे सांगितले. त्यानंतर शरीफ सलीम शाह याने चाकू अख्तरच्या पोटात खुपसला. तसेच आमिन इकबाल अन्सारी याने चेन व्हील रॉडने डोक्यात मारले.

त्यामुळे अख्तर जमिनीवर पडला. तेव्हा तन्वीर शेख, शाहरुख शाह, सोहेल शाह व साबीर शाह यांनी अख्तरला लोखंडी रॉडने मारहाण केली. तेव्हा अख्तरला सोडविण्यासाठी मध्यस्थी केली. त्यावेळी तन्वीर शेख याने फिर्यादीच्या डोक्यात लोखंडी रॉड मारला, मात्र वार चुकविल्याने तो डाव्या डोळ्यावर लागला.

तसेच अस्लम यास सोहेल शाह व साबीर शाह यांनी लोखंडी रॉडने मारहाण केल्याने त्यांच्या डोक्याला दुखापत झाली. त्यावरून सहा जणांसह अन्य दहा ते १२ जणांवर गुन्हा दाखल झाला.