पंचवटी - लग्नपत्रिका वाटण्यासाठी केरळमधून नाशिकमध्ये आलेल्या ३२ वर्षीय तरुणावर तपोवन परिसरात सामूहिक अत्याचाराचा धक्कादायक प्रकार उघडकीस आल्याने खळबळ उडाली आहे. याप्रकरणी आडगाव पोलिसांत अज्ञात रिक्षाचालक व त्याच्या सहकाऱ्याविरुद्ध गुन्हा दाखल करण्यात आला. याप्रकरणी अत्याचार झाला नसून केवळ लूटमार झाल्याचे सांगत तसा जबाबही तरुणाने पोलिसांकडे नोंदविल्याचे पोलिसांनी सांगितले. 

हा तरुण आडगाव नाका भागातील लॉजवर मुक्कामी थांबला होता. भद्रकाली परिसरातील खाऊगल्ली येथे रात्री जेवणासाठी गेला होता. जेवण झाल्यावर मध्यरात्री बाराच्या सुमारास तो मुक्कामाच्या ठिकाणी जाण्यासाठी रिक्षा शोधू लागला. दामोदर थिएटरजवळ थांबलेल्या रिक्षात चार जण बसलेले होते. त्याने संबंधित रिक्षाचालकाला पत्ता सांगून त्या ठिकाणी सोडण्याची विनंती केली. या चार तरुणांसह संबंधित रिक्षाचालक त्या प्रवाशाला घेऊन निघाला. त्याने संबंधित प्रवाशाला ठरलेल्या पत्त्यावर न सोडता रिक्षा तपोवनात नेली. त्या ठिकाणी त्याचे काही साथीदार आधीच मद्यप्राशन करत होते. या सर्वांनी त्याला मारहाण करत बळजबरीने मद्यही पाजले.

त्यानंतर त्याच्यावर सामूहिक अत्याचार करण्यात आला. रिक्षाचालक व त्याचे सहकारी त्याला सोडून फरारी झाले. घाबरलेल्या तरुणाने शेजारील मंदिरात जाऊन घडलेला प्रसंग सांगितल्यावर पुजाऱ्याने त्याला अंगावर घालण्यासाठी कपडे दिले. बुधवारी (ता. ५) सकाळी उठल्यावर तरुणाने आडगाव पोलिस ठाणे गाठत घडलेल्या प्रसंगाची पोलिसांना माहिती दिली. 

अत्याचार नसून मारहाण 
तपोवनात या तरुणावर अत्याचार झाला नसून केवळ लूटमार झाल्याचे पोलिसांनी सांगितले. तरुणाने आपल्यावर अत्याचार झाला नसल्याचे सांगितल्याचेही पोलिस म्हणाले.