नाशिक : महाराष्ट्र राज्‍य पोलिस दलातील खात्‍यांतर्गत पोलिस उपनिरीक्षक संवर्गातील पदभरतीसाठी रविवारी (ता. १०) येथे परीक्षा घेण्यात आली.

नाशिक शहरातील सहा केंद्रांवर पार पडलेल्‍या परीक्षेस उत्तर महाराष्ट्रातून दोन हजार २१८ परीक्षार्थी उपस्‍थित होते. दरम्‍यान, सामान्य ज्ञान विषयातील प्रश्‍न कठीण ठरल्‍याचे परीक्षार्थ्यांनी सांगितले. (2218 appeared for PSI examination under department Participation from North Maharashtra General Knowledge questions proved difficult Nashik)

‘एमपीएससी’तर्फे जाहीर तारखेनुसार रविवारी राज्‍यस्‍तरावर पोलिस उपनिरीक्षक मर्यादित विभागीय स्‍पर्धा पूर्व परीक्षा २०२३ घेण्यात आली. परीक्षेच्‍या पार्श्वभूमीवर जिल्‍हा प्रशासनातर्फे चोख व्‍यवस्‍था केलेली होती.

जिल्‍हा प्रशासनातर्फे १५८ अधिकारी, कर्मचारी तैनात होते. याशिवाय, परीक्षा केंद्रांबाहेर पोलिस बंदोबस्‍त ठेवण्यात आला होता. या परीक्षेसाठी नाशिक शहर-जिल्ह्यासह जळगाव, धुळे, नंदुरबार जिल्‍ह्यांतून परीक्षार्थी उपस्‍थित होते.

परीक्षा झाल्‍यावर मित्रपरिवाराबरोबर चर्चा करताना अनेकांनी गुणांचा अंदाज घेतला. सामान्यज्ञान विषयाचे प्रश्‍न काही प्रमाणात अवघड होते, अशी प्रतिक्रिया काही परीक्षार्थ्यांनी व्‍यक्‍त केली.

उपस्‍थितीचा तपशील असा :

- परीक्षा केंद्रे : एकूण ६

- प्रवीष्ट झालेले : २ हजार ४५८

- परीक्षेला उपस्‍थित : २ हजार २१८

- परीक्षेला अनुपस्‍थित : २४०