नाशिक : महापालिकेकडून आता शहरातील मोकाट व भटक्या जनावरांसाठी रुग्णवाहिकेची सुविधा उपलब्ध करून दिली जाणार आहे. पशुसंवर्धन विभागाकडून यासाठी लवकरच टोल फ्री क्रमांकदेखील उपलब्ध करून दिला जाणार आहे.

महापालिका हद्दीत पाळीव प्राण्यांची संख्या मोठ्या प्रमाणात आहे. त्याचबरोबर भटके श्वान व मोकाट जनावरेदेखील मोठ्या प्रमाणात आहे. (Ambulance facility provided by municipality for stray animals nashik)

अशा मोकाट व भटक्या जनावरांना अपघात किंवा नैसर्गिक कारणांमुळे मृत्यू आल्यास त्यांची विल्हेवाट लावली जात नाही. रस्त्याच्या कडेलाच मृतदेह सडतात. यातून संसर्गजन्य आजाराबरोबरच मोठ्या प्रमाणात दुर्गंधी सुटते.

अनेक मोकाट जनावरांना जखमी अवस्थेत उपचार न झाल्यास मृत्यूला सामोरे जावे लागते. त्यामुळे पशुसंवर्धन विभागाकडून जखमी झालेल्या जनावरांना रुग्णवाहिका उपलब्ध करून दिली जाणार आहे. या रुग्णवाहिकेमध्ये दोन कर्मचारी राहतील.

आवश्यकतेनुसार शासकीय पशुवैद्यकीय दवाखान्यात प्राण्यांना उपचारासाठी दिले जाणार आहे. महापालिकेच्या पशुसंवर्धन विभागाकडून रेबीज लसीकरण मोहीम किंवा प्राण्यांसाठीच्या अन्य मोहिमादेखील रुग्णवाहिकेच्या माध्यमातून उपलब्ध करून दिल्या जाणार आहे.

प्राण्यांच्या रुग्णवाहिकेसाठी संपर्क करण्यासाठी टोल फ्री क्रमांक उपलब्ध करून दिला जाणार आहे. महापालिकेकडून ही सेवा मोफत उपलब्ध करून दिली जाणार आहे, अशी माहिती पशुसंवर्धन अधिकारी डॉ. प्रमोद सोनवणे यांनी दिली.