जुने नाशिक : अमरधाम रोड शितळादेवी मंदिर परिसरात शनिवारी (ता. २२) रात्री अज्ञात संशयितांनी दुचाकीची तोडफोड केली. याबाबत भद्रकाली पोलीस ठाण्यात तक्रार दाखल करण्यात आली आहे. (attempt to spread terror by vandalizing bike Nashik Latest Crime News)

शितळादेवी मंदिर परिसरातील खंडू बाळू शिंदे यांची दुचाकीची (एमएच १५, डीक्यू १०४४) संशयितांनी मोडतोड केली. श्री शिंदे यांनी शनिवारी रात्री कामावरून परतल्यानंतर मंदिर परिसरात त्यांची दुचाकी उभी केली. रविवारी (ता. २३) सकाळी कामावर जाण्यासाठी दुचाकी घेण्यासाठी आले असता, तोडफोड करून दुचाकी खाली पाडल्याचे निदर्शनात आले. दुचाकीची पाहणी केली असता, मागील आणि पुढील दोन्ही भागांची तोडफोड करून मोठे नुकसान करण्यात आल्याचे आढळून आले. त्यांनी परिसरात चौकशी केली.

मात्र, कुठलीही माहिती मिळू शकली नाही. संशयितांनी तोडफोड करून दहशत पसरविण्याचा प्रयत्न केला. यापूर्वीही त्याठिकाणी वाहनांची तोडफोड करणे, सीटवर ब्लेड मारून फाडणे, असे प्रकार घडले आहेत. नेहमी असे प्रकार घडवून दहशत माजविण्याचा प्रयत्न काही जण करीत असतात. पोलिसांनी त्यांच्यावर कारवाई करावी, अशी मागणी परिसरातील नागरिकांनी केली आहे. याशिवाय पोलिसांची गस्तही वाढवावी. जेणेकरून अशाप्रकारांना आळा बसेल, असे नागरिकांकडून सांगण्यात आले.