Nashik Crime News : रेल्वेची आरक्षित ई-तिकीटे आपल्या लॅपटॉप आणि मोबाईलवरून प्रवाशांना त्यांच्या वैयक्तिक वापरकर्ता आयडीमधून काढून विकणाऱ्याला नाशिक रोड रेल्वे सुरक्षा बलाने अंबड पोलिसांच्या मदतीने अटक केली.

राहुल रघुबीरप्रसाद सिंग (रा. अंबड) असे या संशयिताचे नाव आहे. (Black marketing of tickets accused arrested by police nashik crime news)

तिकिटांच्या मोबदल्यात संशयित राहूल हा प्रवाशांकडून शंभर रुपये अतिरिक्त घेत होता. ऑपरेशन उपलब्ध अंतर्गत रेल्वे सुरक्षा बलाचे निरीक्षक हरफूलसिंह यादव यांच्या मार्गदर्शनाखाली सह उपनिरीक्षक एन. के. राघव, मनोज कांबळे, किशोर चौधरी यांनी अंबड पोलिस ठाण्याच्या मदतीने ही कारवाई केली.

राहुल सिंग हा अंबड एमआयडीसीमध्ये वेल्डर म्हणून काम करतो. अधिक पैसे कमवायच्या लालसेपोटी आयआरसीटीसीच्या वेगवेगळ्या वैयक्तिक आयडीवरून रेल्वे आरक्षित ई-तिकीट काढून गरजू प्रवाशांना आणि त्याच्या ओळखीच्या लोकांना शंभर रुपये कमिशन घेऊन ते विकत असल्याची कबुली त्याने पोलिसांना दिली.

राहुल सिंगचा लॅपटॉप व मोबाईल उघडल्यानंतर १५ वैयक्तिक युजर आयडी ॲक्टिव्ह तर ४३ आयडी बंद आढळले. त्याच्या जवळून १४ रेल्वे आरक्षण ई-तिकीट, पाच जुने आरक्षण ई-तिकीट जप्त करण्यात आली.