सिडको (नाशिक) : भारतीय जनता पक्षाच्या (BJP) एका उत्साही पदाधिकाऱ्याकडून सध्या महापालिका निवडणुकीच्या (muncipal election) पार्श्वभूमीवर मतदारांना माहितीपत्रकांचे वाटप करण्यात येत आहे. या पत्रकात नाशिक महापालिकेत (nashik muncipal corporation) महत्त्वाचे पद भूषवत असलेल्या व पक्षाच्या उपमहापौरांचाच ‘फोटो’ न टाकल्याने सध्या हा विषय नागरिकांमध्ये मोठ्या प्रमाणात चर्चेचा विषय ठरत आहे.

उत्साही पदाधिकाऱ्यांच्या कर्तबगारीबाबत चर्चेला उधाण

नाशिक महापालिका निवडणुकीच्या पार्श्वभूमीवर सध्या सिडकोत विविध राजकीय व सामजिक कार्यक्रमांना अक्षरशः ऊत आला आहे. त्यातच सिडकोतील भारतीय जनता पक्षाच्या एका उत्साही पदाधिकाऱ्याकडून सध्या माहितीपत्रकेचे वाटप सुरू आहे. माहितीपत्रक नागरिकांच्या हातात पडते, तेव्हा ‘प्रोटोकॉल’मध्ये दस्तरखुद्द त्यांच्याच पक्षाच्या उपमहापौरांचा फोटो गायब झाल्याने या पदाधिकाऱ्याच्या कर्तबगारीबाबत सिडकोत चांगलेच चर्चेला उधाण आले आहे. हा प्रकार अनवधानाने, मुद्दाम की यामागे बोलविता धनी दुसराच कोणी आहे, याबाबत मात्र पुरेशी माहिती मिळू शकली नाही. असे असले तरी नगरसेवकपदासाठी नव्याने उभे राहण्याची महत्त्वाकांक्षा मनाशी बाळगून असलेल्या इच्छुक उमेदवारास स्वपक्षाचेच उपमहापौर कोण, हे माहीत नसेल तर मग त्या उमेदवाराचा नागरिकांनी भाविष्यात काय म्हणून विचार करावा, असाही प्रश्न यानिमित्त उपस्थित होत आहे.

निवडणुकीपूर्वीच चुका व वादग्रस्त मुद्या

निवडणुकीच्या पार्श्वभूमीवर सर्वच पक्षाचे उमेदवार हेवेदावे विसरून व सर्वांना सोबत घेऊन निवडणूक लढवत असल्याचे आतापर्यंत बघायला मिळाले आहे. कोणी नाराज होणार नाही, याची काळजी नक्कीच घेतली जाते. मात्र, निवडणुकीपूर्वीच अशा चुका व वादग्रस्त मुद्याने हा विषय नागरिकांसाठी चांगलाच चर्चेचा ठरू पाहत आहे.