एकनाथ खडसे विरूध्द रक्षा खडसे रंगणार लढत! निवडणूक चुरशीची

जळगाव : काँग्रेसने (Congress) 'एकला चलो'चा नारा दिल्यामुळे भाजपने स्वबळाची तयारी केली आहे. महापालिका निवडणुकीप्रमाणे जिल्हा बँकेतही (jalgaon district bank election) विरोधकांना धक्कातंत्र देण्याचा भाजपचा प्रयत्न आहे. भाजपच्या (BJP) या निर्णयामुळे राष्ट्रवादी काँग्रेसचे नेते एकनाथ खडसे (eknath khadse) विरूद्ध भाजप खासदार रक्षा खडसे (raksha khadse)अशी लढत होण्याची शक्यता आहे.

काँग्रेसचा भाजपसोबत जाण्यास नकार

जिल्हा बँकेच्या निवडणुकीत भाजपच्या खासदार रक्षा खडसे मैदानात उतरणार आहेत. राष्ट्रवादी काँग्रेस पक्षाने भाजपसोबत जाण्यास नकार दिल्याने भाजप स्वतंत्र लढणार आहे. जळगाव जिल्हा बँकेच्या संचालक निवडणुकीत सर्वपक्षीय पॅनल निश्चित करण्यात आले होते. मात्र काँग्रेस पक्षाने भाजपसोबत जाण्यास नकार दिला होता. काँग्रेसच्या या निर्णयानंतर राष्ट्रवादीनेदेखील भाजपसोबत पॅनल करण्यास नकार दिला आहे. तशी माहिती भाजप नेते तथा माजी मंत्री गिरीश महाजन यांनी दिलीय. या निर्णयामुळे आता राष्ट्रवादीचे एकनाथ खडसे विरुद्ध भाजपच्या रक्षा खडसे असा सामना रंगण्याची शक्यता आहे. भाजप सर्व 21 जागा लढवणार आहे. तसेच दुकरीकडे काँग्रेसनेसुद्धा स्वबळाचा नारा दिल्यामुळे ही निवडणूक चुरशीची होणार आहे.

विविध पक्षांचे नेते बैठकीला उपस्थित

याआधी अजिंठा विश्रामगृहावर 16 ऑक्टोबर रोजी सर्वपक्षीय नेत्यांची बैठक झाली. पालकमंत्री गुलाबराव पाटील, भाजप नेते गिरीश महाजन, राष्ट्रवादी नेते तथा माजी मंत्री गुलाबराव देवकर राष्ट्रवादी नेते तथा माजी आमदार सतीष पाटील, काँग्रेसचे आमदार शिरीष चौधरी शिवसेनेचे आमदार किशोर पाटील आदी नेते बैठकीला उपस्थित होते. या बैठकीत काँग्रेसने भाजपसोबत जाण्यास स्पष्ट शब्दांत नकार दिला. त्यामुळे या बैठकीत कोणताही ठोस निर्णय होऊ शकला नव्हता.