अंतापूर (जि. नाशिक) : कृषी विभागाने बोगस बियाणे, बनावट औषधे, खते विक्री करणाऱ्यांना व्यावसायिकांना परवानगी न देता लक्ष ठेवून कारवाई करावी, अशी मागणी बागलाण तालुक्यातील शेतकऱ्यांनी केली आहे.

सध्या खरीप हंगाम असल्याने बळीराजा मका, सोयाबीन, भुईमूग व इतर बियाणे दुकानातून विकत घेऊन पेरणी करीत आहे. मात्र, चार- पाच वर्षापासून अनेक ठिकाणी पेरणी झाल्यानंतर बियाणे उगवत नसल्याने हजारो रुपये व कष्ट वाया जातात. आता विविध रासायनिक खते, औषधे, कीटकनाशकांच्याही अनेक प्रकारच्या बनावट कंपन्या बाजारात दाखल होवून शेतकऱ्यांची फसवणूक करू शकतात. मागीलवर्षी मुंगसेपाडा येथील हिरामण गावित यांनी मुल्हेर येथील दुकानदाराकडून सोयाबीन बियाणे घेऊन पेरणी केले होते. पंधरा दिवस होऊनही बियाण्यास कोंब न फुटल्याने पीक वाया गेले होते. त्यामुळे तालुका व पंचायत समितीतील कृषी विभाग अधिकारी, कर्मचाऱ्यांनी परवानाधारक, अधिकृत दुकानदारांना बियाणे, औषधे, खते विक्रीची परवानगी देऊन बनावट जातीचे घटक विक्री होणार नाहीत, याबाबत सूचना देण्याची मागणी मुल्हेरचे माजी सरपंच पंडितराव जगताप, रोहिदास जाधव, निवृत्ती खैरनार, राजेंद्र गांगुर्डे, हिरामण गावित, नंदलाल निकम, शिवाजी देवरे, सुनील जाधव, भास्कर आहिरे, आदिवासी पश्‍चिम परिसरासह शेतकऱ्यांनी केली आहे.

''पावसाळा सुरू झाल्यानंतर शेतकरी मिळेल त्या दुकानातून बियाणे, खते, औषधे घेत असतो. परंतु, शेतकऱ्यांची फसवणूक होणार नाही, बियाणे व इतर घटकांची वाजवीपेक्षा जास्त किंमत राहणार नाही, याबाबत कृषी विभागाने दक्ष रहावे. बनावट कंपनीद्वारे बोगस बियाणे, खते, औषधांची विक्री झाल्यास दुकानदाराचा कायमस्वरूपी परवाना रद्द करून गंभीर स्वरूपाची कारवाई करावी.'' - रामकृष्ण अहिरे, माजी सभापती, पंचायत समिती, बागलाण