नाशिक : पत्रकार हल्ल्याच्या निषेधार्थ काळ्या फिती लावून कामकाज

मालेगाव (जि. नाशिक) : येथील पत्रकार शंकर वाघ यांच्यावर झालेल्या हल्ल्याप्रकरणी पोलिसांकडून संशयितांना अटकेसाठी होत असलेल्या दिरंगाईच्या निषेधार्थ मालेगाव जिल्हा मराठी पत्रकार संघाने काळ्या फिती लावून कामकाज सुरू केले. संघाने गुरुवारी (ता. २३) अपर जिल्हाधिकारी माया पाटोळे यांना मागणीचे निवेदन सादर केले.

निवेदनात पत्रकार वाघ गर्दीचे वृत्तांकन करतांना त्यांना विक्की पाटील व पप्पू कासवे आदींसह १५ ते २० जणांनी हल्ला करत मारहाण केली. या प्रकरणी छावणी पोलीस ठाण्यात गुन्हा दाखल होवून आठ दिवस उलटले असताना पोलिस निरीक्षक संजय गायकवाड व सहकाऱ्यांनी संशयितांना अटक केलेली नाही. तपास अधिकारी पोलिस उपअधीक्षक प्रदीप जाधव यांची तपासाकामी दिरंगाई संशयास्पद आहे. याउलट संशयित शहरात बिनधास्त फिरताना आढळून येत आहेत. पोलिस हल्लेखोरांना अटकपूर्व जामीनासाठी वेळ देत आहेत की काय, असा संशय येत आहे. पत्रकार संघाने गुरुवारी तातडीची बैठक घेऊन अपर जिल्हाधिकारी पाटोळे यांना निवेदन सादर केले. संशयितांना अटक होत नाही तोपर्यंत काळ्या फिती लावून काम करण्याचा निर्धार व्यक्त करण्यात आला.

शिष्टमंडळात संघाचे अध्यक्ष प्रल्हाद बोरसे, सचिव हेमंत शुक्ला, प्रमोद सावंत, बिपीन बागुल, ब्रिजमोहन शुक्ला, जहुर खान, शफीक शेख, शंकर वाघ, सुदर्शन पगार, हेमंत धामणे, मगनसिंग पाटील, अतुल शेवाळे, मनोहर शेवाळे, मुजम्मील इनामदार, निलेश शिंपी, नरेंद्र देसले, खलील अब्बास आदी सहभागी झाले होते.