नाशिक : दादरा, नगर हवेली येथील मद्य नाशिकमध्ये तस्करी करून आणले जात असताना, सातपूर येथील पपया नर्सरीजवळ सापळा रचून पकडले. राज्य उत्पादन शुल्क विभागाच्या पथकाने शुक्रवारी (ता. २६) ही कारवाई केली असून, एक इनोव्हा कार व विदेशी मद्यसाठा असा साडेसात लाखांचा मुद्देमाल जप्त केला आहे. (Illegal liquor stock seized from Innova in Satpur Nashik Crime latest marathi news)

मुकेश शिवाजीभाई बागूल (२९, रा. लक्ष्मीनगर, काडापुल पुनागाव, जि. सुरत), असे संशयिताचे नाव आहे. राज्य उत्पादन शुल्क विभागाच्या नाशिकच्या पथकास त्र्यंबक- नाशिक रोडने परराज्यातील मद्याची अवैध वाहतूक होणार असल्याची खबर मिळाली होती.

विभागीय उपायुक्त अर्जुन ओहोळ, जिल्हा अधीक्षक शशिकांत गर्जे यांच्या मार्गदर्शनाखाली पथकाने सातपूर येथील पपया नर्सरीजवळ सापळा रचून संशयित वाहनांची तपासणी केली असता, या इनोव्हा कारमध्ये (जीजे- ०५- सीजी- ३८७०) दादरा नगर हवेली या केंद्रशासित प्रदेशात विक्रीसाठी असणारे व महाराष्ट्रात विक्रीस प्रतिबंधित विदेशी मद्य इनोव्हाच्या विविध भागात चोर कप्पे करून दडवून ठेवल्याचे आढळून आले.

सदरची कामगिरी निरीक्षक एस. एस. देशमुख, दुय्यम निरीक्षक प्रवीण ठाकूर, एम. आर. तेलंगे, सहदुय्यम निरीक्षक एच. एस. नेहेरे, जवान विजेंद्र चव्हाण, रमाकांत मुंढे, किरण कदम,. गोकूळ परदेशी यांनी बजावली. तपास प्रवीण ठाकूर हे करीत आहेत.