Nashik News: शहरातील भद्रकाली पोलिस ठाण्याच्या हद्दीत सुरू असलेल्या अवैध धंद्यांचा मुद्दा थेट नागपुरात सुरू असलेल्या हिवाळी अधिवेशनात चर्चेला आला आहे.

भाजप आमदार नीतेश राणे यांनी सदर मुद्दा उपस्थित करीत पोलिस ठाण्याचे वरिष्ठ अधिकारी मात्र कारवाई करण्यास टाळाटाळ करीत असल्याचा गंभीर आरोपही केला आहे. (issue of illegal businesses in Bhadrakali in winter session nashik news)

याबाबत नवनियुक्त पोलिस आयुक्त संदीप कर्णिक याप्रकरणी काय भूमिका घेतात याकडे नाशिककरांचे लक्ष लागून आहे. दरम्यान, गेल्या वर्षीही हिवाळी अधिवेशनात आ. राणे यांनी अंबड पोलिस ठाण्याच्या हद्दीतील अवैध धंद्यांविषयी प्रश्न उपस्थित केला असता, तत्कालीन पोलिस निरीक्षक भगीरथ देशमुख यांची बदली करण्यात येऊन उच्चस्तरीय चौकशी सुरू आहे.

नागपूर येथे हिवाळी अधिवेशन सुरू असून, बुधवारी (ता. १३) सकाळ सत्रामध्ये भाजप आमदार नीतेश राणे यांनी नाशिकमधील भद्रकाली पोलिस ठाण्याच्या हद्दीमध्ये मोठ्या प्रमाणात अवैध धंदे सुरू असल्याचे सांगत, विशिष्ट समाजाकडून रात्री-बेरात्रीपर्यंत अवैध धंदे चालविले जात असल्याचे सांगितले.

तसेच, या अवैध धंद्यांबाबत भद्रकाली पोलिस ठाण्याचे वरिष्ठ पोलिस निरीक्षक गजेंद्र पाटील यांच्याशी संपर्क साधून त्यांना अवैध धंद्यांची माहितीही दिली. परंतु त्यांनी कारवाई करण्यास टाळाटाळ केल्याचाही गंभीर आरोप राणे यांनी करीत सभागृहामार्फत कारवाई करण्याची मागणी केली.

स्थानिक लोकप्रतिनिधी गप्प का?

भद्रकालीतील अवैध धंद्यांविषयीचा मुद्दा राणे यांनी उपस्थित केला असला तरी, नाशिकचे स्थानिक लोकप्रतिनिधी याबाबत गप्पा का, असा प्रश्न काही सुजाण नागरिकांनाही पडला आहे.

"या प्रकरणाची सखोल चौकशी केली जाईल. त्यानुसार योग्य ती कारवाईही केली जाईल." - संदीप कर्णिक, पोलिस आयुक्त, नाशिक.