येवला : सातबारा उताऱ्यावर मालकी हक्काची घेतलेली नोंद प्रमाणित करण्यासाठी राजापूर येथील मंडलाधिकाऱ्याला २५ हजारांची लाच घेताना लाचलुचपत प्रतिबंधक विभागाने अटक केली.

याबाबत शहर पोलिस ठाण्यात गुन्हा दाखल झाला आहे. (Mandal officer of Rajapur arrested for accepting bribe of 25 thousand Nashik Crime)

पंचांसमक्ष २५ हजार रुपयांची लाचेची रक्कम स्वीकारली, म्हणून राजापूर येथील मंडलाधिकारी मनोहर अनिल राठोड (वय ३३) यांना अटक करण्यात आली.

याबाबत एसीबीने सांगितले, की तक्रारदार येवला तालुक्यातील राजापूर येथील शेतकरी असून, त्यांनी विकत घेतलेल्या राजापूर येथील जमिनीच्या सातबारा उताऱ्यावर तलाठ्यांनी ४ जानेवारीला मालकी हक्काबाबत नोंद घेतली होती.

ती नोंद प्रमाणित करण्यासाठी राजापूरचे मंडलाधिकारी राठोड टाळाटाळ करीत होते. त्यांनी पैशाची मागणी केली. त्याबाबत तक्रारदाराने एसीबीकडे तक्रार केली होती. तक्रारदाराकडून पंचांसमक्ष २५ हजार रुपये घेतले, म्हणून त्यांना मुद्देमालासह अटक करण्यात आली आहे.

लाचलुचपत प्रतिबंधक विभागाच्या पोलिस अधीक्षिका शर्मिष्ठा घारगे वालावलकर, अप्पर अधीक्षक माधव रेड्डी यांच्या मार्गदर्शनाखाली उपधीक्षक अनिल बडगुजर, हवालदार प्रभाकर गवळी, पोलिस नाईक संजय ठाकरे यांनी ही कारवाई केली.