जुने नाशिक : मुंबई उच्च न्यायालयाचे वकील संतोषकुमार भालेराव यांची बॅग द्वारका ते ट्रॅक्टर हाउस भागात गहाळ झाली होती. सतर्क नागरिक आणि भद्रकाली पोलिसांच्या तप्तरतेने कन्नमवार पुलाखाली ही बॅग मिळून आली. बॅग मिळाल्याने श्री. भालेराव यांनी पोलिसांचे आभार मानत समाधान व्यक्त केले. (Mumbai lawyer lost bag returned by police promptness Nashik Latest Marathi News)

कन्नमवार पुलाखाली बॅग बेवारस अवस्थेत पडून होती. एका सतर्क नागरिकांच्या हे लक्षात आले, त्याने भद्रकाली पोलिसांना माहिती दिली. गस्तीवर असलेले बीट मार्शल दयानंद सोनवणे, विकी रुमणे यांना माहिती मिळताच ते घटनास्थळी दाखल झाले. बॅगेची तपासणी केली असता त्यात काही कागदपत्रे मिळून आली. त्यावर असलेल्या मोबाईल क्रमांकावर पोलिसांनी संपर्क साधला. मुंबई उच्च न्यायालयाचे वकील संतोषकुमार भालेराव यांची ती बॅग असल्याचे समजले.

द्वारका ते ट्रॅक्टर हाउस भागात बॅग गहाळ झाल्याची माहिती श्री. भालेराव यांनी पोलिसांना दिली. पोलिसांनी त्यांना पोलिस ठाण्यात बोलावून बॅग त्यांचीच असल्याची खात्री केली. त्यानंतर उपनिरीक्षक श्री. गवळी यांच्या हस्ते बॅग भालेराव यांना देण्यात आली. बॅगेत महत्त्वाच्या वस्तू होत्या, त्या मिळून आल्याने त्यांचा आनंद झाला. त्यांनी भद्रकाली पोलिसांचे आभार मानले.