NAMCO Bank Election : नाशिक मर्चंट को-ऑपरेटिव्ह बँकेच्या पंचवार्षिक निवडणुकीत सत्ताधारी प्रगती पॅनलसह अपक्षांचा प्रचार अंतिम टप्प्यात आहे. बॅंकेच्या १९ जागांसाठी रविवारी (ता. २४) मतदान होईल.

निवडणुकीसाठी ९९ ठिकाणी ३२४ मतदान केंद्रांची व्यवस्था करण्यात आली आहे. सोमवारी (ता. २५) छत्रपती संभाजी महाराज इनडोअर स्टेडिअममध्ये मतमोजणी करण्यात येईल, अशी माहिती निवडणूक निर्णय अधिकारी फय्याज मुलाणी यांनी दिली. (NAMCO Bank Election Voting tomorrow at 324 polling stations for Nashik news)

नाशिक मर्चंट को-ऑपरेटिव्ह ही मल्टिस्टेट शेड्यूल्ड बँक आहे. जिल्ह्यासह परराज्यांत बँकेचे एक लाख ८८ हजार ६३८ मतदार आहेत. रविवारी होणाऱ्या मतदानाची प्रशासकीय तयारी पूर्ण करण्यात आली असून, अडीच हजार कर्मचारी नियुक्त करण्यात आले. या निवडणुकीसाठी रविवारी सकाळी आठ ते सायंकाळी पाच या वेळात मतदान होईल.

निवडणुकीसाठी ३२४ मतदान केंद्रे असून, नाशिक शहरात १५५ मतदान केंद्रांवर ९० हजार ९१६ मतदार आहेत. जिल्ह्यातील ग्रामीण भागात १४४ मतदान केंद्रांवर ८२ हजार ८९३ मतदार आहेत. जिल्ह्याबाहेर मुंबई, पुणे, चाकण, छत्रपती संभाजीनगर, जालना, वैजापूर, जळगाव, धुळे, दोंडाईचा, नंदुरबार, अहमदनगर, श्रीरामपूर, राहाता, संगमनेर येथे २० मतदान केंद्रांवर १३ हजार ७८७ हजार मतदार आहेत.

राज्याबाहेर सुरत व हैदराबाद येथे प्रत्येकी एक आणि दोन मतदान केंद्रांची रचना करण्यात आली. मतदानासाठी निवडणूक आयोगाने किंवा शासनाने विहित केलेल्या पुराव्यांपैकी फोटोसहित शासकीय पुरावा ग्राह्य धरण्यात येईल.

रविवारी मतदान झाल्यावर सोमवारी सकाळी आठला श्री छत्रपती संभाजी महाराज स्टेडियममध्ये मतमोजणीस सुरवात होईल. एकूण १०८ टेबलांवर मतमोजणी होणार आहे. या निवडणुकीचे मतदान आणि मतमोजणीचे व्हिडिओ चित्रीकरण करण्यात येईल. मतदान व मतमोजणीसाठी कडेकोट पोलिस बंदोबस्त ठेवण्यात येणार आहे.