Nashik AIMA News : दिंडोरी तालुक्यातील अक्राळे येथील औद्योगिक भूखंड विक्री लिलाव पद्धतीने न करता प्रथम येणाऱ्यास प्राधान्य या तत्त्वाने त्याचे वाटप व्हावे आणि भूखंड विक्रीची संख्या वाढवावी, अशी मागणी अंबड इंडस्ट्रीज अँड मॅन्युफॅक्चरर्स असोसिएशन(आयमा) ने महाराष्ट्र औद्योगिक विकास महामंडळाचे प्रादेशिक अधिकारी नितीन गवळी यांच्याकडे निवेदनाद्वारे केली आहे. (Nashik AIMA marathi news)

नाशकात अंबड व सातपूर औद्योगिक वसाहतीत उद्योग व्यवसायासाठी भूखंड शिल्लक नसल्याने नवीन उद्योगांसाठी तळेगाव-अक्राळे येथील जागा महाराष्ट्र औद्योगिक विकास महामंडळाने आरक्षित केली आहे. त्यातील मोजकेच २७ भूखंड विक्रीसाठी खुले केले आहेत. त्यासाठी तब्बल १९७ अर्ज प्राप्त झाल्याचे कळते.

यामुळे लिलाव पद्धतीने या भूखंडांची विक्री होण्याची शक्यता निर्माण झाल्याचे कळते. तसे झाल्यास फक्त बडे आणि सधन गुंतवणूकदारच हे भूखंड खरेदी करतील व लहान उद्योजक भूखंड खरेदी करण्यापासून वंचित राहतील. त्यामुळेच प्रथम येणाऱ्यास प्राधान्य या तत्त्वाने ज्या उद्योजकांचे भूखंड कर्जासाठी अर्ज आले असतील त्याप्रमाणे त्यांना अक्राळे येथील भूखंडांचे वाटप करावे.

तसेच भूखंड विक्रीची संख्या वाढवावी. यामुळे नवीन उद्योजकांवर अन्याय होणार नाही व त्यांनाही उद्योग व्यवसाय सुरु करता येईल, असेही आयमातर्फे निवेदनात नमूद केले आहे. निवेदनाच्या प्रती मुख्यमंत्री एकनाथ शिंदे, उद्योगमंत्री उदय सामंत, एमआयडीसीचे मुख्य कार्यकारी अधिकारी बिपिन शर्मा, उपमुख्य कार्यकारी अधिकारी सोनाली मुळे यांनाही पाठविल्या आहेत. निवेदनावर आयमाचे अध्यक्ष ललित बूब, सरचिटणीस प्रमोद वाघ तसेच बीओपीपी चेअरमन ज्ञानेश्वर गोपाळे यांच्या सह्या आहेत. ( latest marathi news )