सोग्रस : द्राक्ष व्यापाऱ्याकडील थकीत रक्कम घेण्यासाठी मध्यप्रदेश राज्यात जाणाऱ्या शेतकऱ्यांच्या कारचे स्टेअरिंग लॉक होऊन झालेल्या अपघातात चांदवड तालुक्यातील कानमंडाळे येथील एका तरुण शेतकऱ्याचा शेतकऱ्याचा जागीच मृत्यू झाला. तर पाचजण जखमी झाल्याची घटना शनिवारी (ता.२) मध्यरात्रीच्या सुमारास घडली. या घटनेत पाचजण जखमी झाले आहेत. (Nashik accident Madhya Pradesh Grape growers died marathi news)

याबाबत माहिती अशी की, चांदवड तालुक्यातील कानमंडाळे येथील शेतकऱ्यांनी द्राक्षमाल मध्यप्रदेशच्या व्यापाऱ्याला दिला होता. परंतु, विक्री केलेल्या मालाचे पैसे शेतकऱ्यांना दिले नव्हते. थकीत रक्कम घेण्यासाठी निवृत्ती जाधव, शंकर जाधव, कृष्णा मोरे, शरद लोखंडे, सनी अहिरे, मंगेश शिंदे शनिवारी (ता.२) कारने मध्यप्रदेशकडे निघाले होते.

गुना जिल्ह्याच्या हद्दीत आल्यानंतर स्टेअरिंग लॉक झाल्याने कार दुभाजकावर आदळली. या घटनेत चालकाशेजारी बसलेल्या निवृत्ती रामनाथ जाधव (वय ४०) या तरुण शेतकऱ्याचा जागीच मृत्यू झाला. तर अन्य पाचजण जखमी झाले. जखमींवर शासकीय रुग्णालयात उपचार सुरु आहेत. दरम्यान, सोमवारी (ता. ४) दुपारी निवृत्ती जाधव यांच्यावर शोकाकूल वातावरणात अंत्यसंस्कार करण्यात आले. (Latest Marathi News)