Nashik Crime News : शहरातील सोसायट्या, सार्वजनिक ठिकाणांवर उभ्या असलेल्‍या वाहनांवर चोरट्यांचा डोळा असल्‍याचे समोर येते आहे. गुरुवारी (ता. २५) विविध पोलिस ठाण्यांमध्ये तीन दुचाकी, एक चारचाकीसह रिक्षा चोरीचे गुन्‍हे दाखल करण्यात आले आहेत. (Nashik Crime Vehicle thieves on rise in city news)

दुचाकी चोरीतील पहिल्‍या घटनेत गंगापूर रोडवरील शहीद चित्ते पूल (बापू पूल) परिसरात गुरुवारी (ता. २५) रात्री आठच्‍या सुमारास दुचाकी चोरीस गेली. गोदापार्क परिसरात उभी केलेली दुचाकी चोरीस गेल्‍याची फिर्याद विशाल शैलेश घाडगे या युवकाने म्‍हसरूळ पोलिस ठाण्यात दिली आहे.

दुसऱ्या घटनेत पळसे येथील जुना कारखाना रोडवर २१ एप्रिलला मध्यरात्रीतून ५० हजार रुपये किमतीची दुचाकी चोरीस गेली. याप्रकरणी पंढरीनाथ केरू पाटील यांनी नाशिक रोड पोलिस ठाण्यात फिर्याद दिली आहे. तिसऱ्या घटनेत त्र्यंबक रोडवरील चंद्रभागा लॉन्‍स येथील वाहनतळावरून दुचाकी वाहन चोरीस गेले. २५ हजार रुपये किमतीची दुचाकी चोरीस गेल्‍याची फिर्याद हर्शद महाजन यांनी सातपूर पोलिस ठाण्यात दिली आहे. (Latest Marathi News)

तर चारचाकी वाहन चोरीची घटना जुने नाशिक भागातील कोकणीपुरा येथे घडली आहे. बुधवारी (ता. २४) मध्यरात्री या परिसरातून चारचाकी वाहन चोरीस गेले. तीन लाख रुपये किमतीची मारुती सुझुकी कंपनीची स्‍विफ्ट कार चोरीस गेल्‍याची फिर्याद कैसर कोकणी यांनी भद्रकाली पोलिस ठाण्यात दिली आहे.

तर भद्रकालीतील तलावडी भागातून बुधवारी (ता. २४) रात्री अकराच्‍या सुमारास रिक्षा चोरीला गेली. ५० हजार रुपये किमतीची रिक्षा चोरीस गेल्‍याची फिर्याद अजीज शेख यांनी भद्रकाली पोलिस ठाण्यात दिली होती. पोलिसांनी या प्रकरणी संशयित मेहबूब शेख यास गुरुवारी (ता. २५) रात्री अकराच्‍या सुमारास अटक केली आहे.