नांदगाव : तालुक्यातील जातेगाव येथे स्वस्त धान्य दुकान क्र. ५७ चे संचालक सुभाष पवार यांना येथील स्वस्त धान्य दुकान क्र. ५६ चे ग्राहक आबा शिवराम राऊत याने शिवीगाळ करुन धान्य वितरणाचे ई- पॉज मशिन फोडले. पवार यांच्या तक्रारीवरुन नांदगाव पोलिस ठाण्यात गुन्हा दाखल करण्यात आला आहे.

जातेगाव येथील सुभाष पोपट पवार यांच्याकडे स्वस्त धान्याचे क्रमांक ५७ चे दुकान आहे. येथील विविध कार्यकारी सेवा सोसायटीचे स्वस्त धान्य दुकान क्रमांक ५६ ग्राहकांनी केलेल्या तक्रारींमुळे चौकशीअंती बंद केले आहे. त्यामुळे ग्राहकांची गैरसोय होऊ नये म्हणून तात्पुरती व्यवस्था म्हणून सुभाष पवार यांच्या क्रमांक ५७ च्या दुकानातून डिसेंबर २०२१ पासून शासकीय आदेशानुसार ग्राहकांना जोडण्यात आले आहे.

हेही वाचा: सीमावादात रक्त सांडायला मराठी माणूसच का?

आबा राऊत यांनी शुक्रवारी (ता. १०) दुपारी एकच्या दरम्यान मद्यपान करून पवार यांना शिवीगाळ करण्यास सुरवात केली. त्यांची समजूत काढून नोव्हेंबर महिन्याचे धान्यही दिले. त्यानंतरही राऊत यांनी ऑक्टोबर महिन्यातील धान्याची मागणी करीत वाद घालण्यास सुरवात केली. त्याची खात्री व्हावी म्हणून ई- पॉज मशीनवर राऊत याच्या हाताच्या बोटांचा ठसा घेवून मागील महिन्याचे धान्य शिल्लक नसल्याचे लक्षात आणून दिले. असे असतानाही राऊत यांनी ई- पॉज मशीन फेकून दिले. त्यानुसार नांदगाव पोलिसात गुन्हा दाखल करण्यात आला आहे. पोलिस निरीक्षक रामेश्‍वर गाढे- पाटील यांच्या मार्गदर्शनाखाली पोलिस उपनिरीक्षक मनोज वाघमारे, पोलिस हवालदार मोरे, पोलिसनाईक अनिल गांगुर्डे, प्रदीप बागूल तपास करीत आहे.