NMC News : महापालिकेकडून (NMC )आगामी आर्थिक वर्षात उत्पन्नात वाढ करण्याबरोबरच वाहनतळांचा प्रश्‍न मार्गी लावण्यासाठी वाहनतळ उभारण्याचा निर्णय घेण्यात आला आहे. त्यासाठी अतिरिक्त आयुक्त प्रदीप चौधरी यांच्या अध्यक्षतेखाली वाहनतळ समिती गठित करण्यात आली आहे. पहिल्या टप्प्यात समावेशक आरक्षणाखाली विकसित झालेली ४ व गोदावरी नदी किनाऱ्यावर असलेल्या २, तसेच भालेकर हायस्कूललगत असलेल्या जागेमध्ये १ अशी सात वाहनतळ विकसित करण्याचा निर्णय घेण्यात आला आहे. (nmc Decision to develop parking )

यात साडेतीनशे चारचाकी, पाचशे दुचाकींच्या पार्किंगचा प्रश्न यातून सुटणार आहे. शहरात मोठ्या प्रमाणात रस्ते झाले तरी वाहनांची संख्या सातत्याने वाढत असल्याने वाहने रस्त्यावर लावली जात आहे. परिणामी बेशिस्ती बरोबरच अनेक ठिकाणी वाहतूक कोंडीचा प्रश्न निर्माण होत आहे. महापालिकेने यापूर्वी सर्वसमावेशक आरक्षणाखाली तीन वाहनतळ विकसित केली.

मात्र तेथे खासगी कामासाठी वापर केला जात आहे. तर वाहतुकीचा प्रश्न बघत असताना महापालिकेने वाहनतळ विकसित करण्यात आलेले नाही. स्मार्टसिटी प्रकल्पांतर्गत शहरात ३३ ठिकाणी पार्किंग व्यवस्थापन करण्यात आले होते. त्याची जबाबदारी ट्रायझेन टेक्नॉलॉजी प्रायव्हेट लिमिटेड कंपनीला देण्यात आली. पहिल्या टप्प्यात कंपनीमार्फत प्रायोगिक तत्त्वावर दहा ठिकाणी पार्किंग स्लॉट सुरू करण्यात आले.

मात्र कोरोनामुळे पार्किंग स्लॉट बंद करण्यात आले. त्यानंतर संबंधित कंपनीने १७ लाख रुपये रॉयल्टी सूट देण्याची मागणी केली व दुचाकीसाठी प्रतितास पाचऐवजी १५, तर चारचाकी १० ऐवजी ३० रुपये शुल्क वाढ मागितली होती. मात्र महापालिकेने संबंधित कंपनीबरोबरच करार रद्द केला. एकंदरीत शहरांमध्ये वाहनांची संख्या सातत्याने वाढत असल्याने वाहतूक कोंडीचा प्रश्न निर्माण झाला आहे. त्यामुळे महापालिकेने पहिल्या टप्प्यात आठ ठिकाणी वाहनतळ विकसित करण्याचा निर्णय घेतला आहे.

येथे होणार वाहनतळ विकसित

- भालेकर हायस्कूल मैदान,

- म्हसोबा पटांगण

- कॅनडा कॉर्नर

- मुंबई नाका

- मेन रोड

- सिता गुंफा

- यशवंत महाराज पटांगण

''वाहतुकीचा प्रश्‍न लक्षात घेता शहरात पहिल्या टप्प्यात सात वाहनतळ विकसित केली जाणार आहे.''- प्रशांत पाटील, उपायुक्त, वाहन समिती सदस्य, महापालिका.