NMC News : नाशिक महापालिकेकडून अंदाजपत्रक मंजुरीसाठी उद्या विशेष महासभा

नाशिक : लोकसभा निवडणुकीची आचारसंहिता लागण्याची शक्यता लक्षात घेत महापालिकेकडून आगामी आर्थिक वर्षासाठी २५५० कोटी रुपयांचे अंदाजपत्रक मंजुरी करण्यासाठी १६ फेब्रुवारीला विशेष महासभा बोलविण्यात आली आहे. (Special General Assembly tomorrow for budget approval from Nashik Municipal Corporation nashik news)

लोकसभा निवडणूक एप्रिल किंवा मे महिन्यात होणार आहे. त्यासाठी आचारसंहिता घोषित केली जाणार आहे. मार्च महिन्याच्या पहिल्या आठवड्यात आचारसंहिता लागण्याची शक्यता आहे. त्याअनुषंगाने महापालिकेने आर्थिक वर्षाची कामे पूर्ण करण्याची कारवाई सुरू करण्यात आली आहे.

२०२४-२५ या आर्थिक वर्षासाठी महापालिकेकडून अंदाजपत्रक मंजूर केले जाणार आहे. अंदाजपत्रकाला ३१ मार्चपूर्वी मंजुरी मिळणे गरजेचे आहे. जेणेकरून १ एप्रिल या आर्थिक वर्षाच्या पहिल्या दिवसापासून अंदाजपत्रकाचे अंमलबजावणी करता येईल.

मात्र, यंदा लोकसभा निवडणुकीची आचारसंहिता लागण्याची शक्यता असल्याने लवकरात लवकर अंदाजपत्रकाला मंजुरी घेण्यासाठी महापालिका प्रशासनाने १६ फेब्रुवारीला विशेष महासभा बोलविण्याचा निर्णय घेतला आहे.

जवळपास २५५० कोटी रुपयांचे अंदाजपत्रक आयुक्त स्थायी समितीला सादर करतील. स्थायी समितीनंतर महासभेवर लोकप्रतिनिधींच्या सूचनांचा अंतर्भाव करून अंदाजपत्रक सादर करतील.

दरम्यान, आगामी आर्थिक वर्षाच्या अंदाजपत्रकामध्ये घर व पाणीपट्टीच्या दरात कुठलीही वाढ होणार नसल्याचे यापूर्वीच स्पष्टीकरण दोन्ही विभागाकडून देण्यात आले आहे.

त्यामुळे यंदा नागरिकांवर कराचा बोजा राहणार नाही. मात्र, खर्चाची तरतूद करताना आगामी सिंहस्थाचा विचारदेखील करावा लागणार आहे.