अभोणा (जि. नाशिक) : पोलिस ठाण्यात वाद मिटविल्याचा मोबदला व कोर्टात केस न पाठविण्यासाठी दोन हजारांची लाच (Bribe) घेताना येथील पोलिस ठाण्यातील हवालदार (Constable) रमण तुळशीराम गायकवाड यांना लाचलुचपत प्रतिबंधक खात्याने रंगेहाथ ताब्यात घेतले.

तक्रारदाराने दिलेल्या फिर्यादीत म्हटले आहे की, त्यांच्या नातेवाईकात भांडण झाल्याने त्यांच्याविरुद्ध अभोणा पोलिस ठाण्यात अदखलपात्र गुन्हा दाखल असून, तक्रारदार व त्यांचे नातेवाईक यांच्यातील वाद आपसात मिटला आहे. परंतु, पोलिस हवालदार रमण गायकवाड यांनी तक्रारदार व त्यांच्या नातेवाईकांना त्यांच्यावर कोर्टात केस न पाठविण्यासाठी तसेच, पोलिस ठाण्यात वाद मिटविल्याच्या मोबदल्यात प्रत्येकी रुपये एक हजार याप्रमाणे दोन हजार रुपये लाचेची मागणी केली. तक्रारदाराने लाचलुचपत प्रतिबंधक विभागाच्या नाशिक कार्यालयात तक्रार दिली. त्यावरून गुरुवार (ता. ५) पोलिस ठाण्यात सापळा रचून लाचेची रक्कम स्वीकारतांना रंगेहाथ ताब्यात घेण्यात आले.