नाशिक : नाशिक ग्रामीणचे पोलीस अधीक्षक शहाजी उमाप यांची पदोन्नतीने पोलीस उपमहानिरीक्षक तथा अपर पोलीस आयुक्त पदावर मुंबईत तर, नाशिक परिक्षेत्राचे विशेष पोलीस महानिरीक्षक डॉ. बी.जी. शेखर-पाटील यांची बदलीचे आदेश गृहविभागामार्फत जारी करण्यात आले आहेत. (Police Transfer Vikram Deshmane as Superintendent of Police Umap replacement Dutta Karale new Special Inspector General of Police of Nashik)

आगामी लोकसभा निवडणुकीच्या पार्श्वभूमीवर सध्या राज्यातील पोलीस दलामध्ये बदल्यांचे सत्र सुरू आहे. त्यानुसार, गेल्या काही दिवसात पोलीस दलातील सहायक पोलीस आयुक्तांपासून ते उपनिरीक्षकांच्या बदल्या करण्यात आल्या आहेत.

तर, गृहविभागाने बुधवारी (ता. ३१) राज्यातील अपर पोलीस महासंचालक ते पोलीस उपमहानिरीक्षक या पदांवरील सुमारे ६४ पोलिस अधिकाऱ्यांच्या बदल्यांचे आदेश जारी केले आहेत.

त्यानुसार, नाशिक ग्रामीणचे पोलीस अधीक्षक शहाजी उमाप यांची अपर पोलीस आयुक्त या पदावर पदोन्नतीने मुंबईतील विशेष शाखेत बदली झाली आहे. तर ठाणे ग्रामीणचे पोलीस अधीक्षक विक्रम देशमाने यांची नाशिक ग्रामीणचे पोलीस अधीक्षक पदी बदली झाली आहे. देशमाने हे २०१२ ते १४ या दरम्यान नाशिक ग्रामीणला अपर पोलीस अधीक्षक म्हणून कार्यरत होते.

त्याचप्रमाणे, नाशिक परिक्षेत्राचे विशेष पोलीस महानिरीक्षक डॉ. बी.जी. शेखर-पाटील यांचीही बदली झाली असून त्यांची पदस्थापना करण्यात आलेली नाही.

तर, ठाणे शहराचे पोलीस सहआयुक्त दत्तात्रय कराळे यांची नाशिक परिक्षेत्रात नवीन विशेष पोलीस महानिरीक्षकपदी बदली झाली आहे. कराळे यांनी यापूर्वी नाशिक शहर आयुक्तालयात उपायुक्त तर, जळगाव जिल्ह्याचे पोलीस अधीक्षक म्हणून कार्यभार सांभाळलेला आहे.

डॉ. सिंगल नागपूरचे आयुक्त

या बदल्यांमध्ये राज्य रस्ता महामार्ग विभागाचे अपर पोलीस महासंचालक डॉ. रवींद्र कुमार सिंगल यांची नागपूरचे पोलीस आयुक्त म्हणून बदली झाली आहे.

त्याचप्रमाणे, दीपक पांडे यांची महिला व बाल अत्याचार प्रतिबंधक विभागाचे अपर पोलीस महासंचालकपदी, संजय दराडे यांची कोकण परिक्षेत्राचे विशेष पोलीस महानिरीक्षकपदी, जळगावचे पोलीस अधीक्षक एम राजकुमार यांची सोलापूरचे पोलीस आयुक्तपदी, एमसीव्ही महेश्वर रेड्डी यांची जळगाव पोलीस अधीक्षकपदी यांच्याही बदल्यांचे आदेश जारी झाले आहेत.