नाशिक : प्रियकराशी असलेल्या शारीरिक संबंधाची बाब उघड झाली. त्यानंतरही प्रियकराने लग्नास नकार दिल्याने अल्पवयीन मुलीने नैराश्‍यातून आत्महत्या केली. याप्रकरणी संशयित प्रियकराविरुद्ध आत्महत्येस प्रवृत्त केल्याप्रकरणी देवळाली कॅम्प पोलिसात गुन्हा दाखल करण्यात आला आहे.

मयत अल्पवयीन मुलीच्या वडिलांनी पोलिसात दिलेल्या फिर्यादीनुसार, १ जुलैला रात्री आठच्या सुमारास संशयित आदित्य उत्तम भालेराव (२१, रा. जुनी स्टेशनवाडी, देवळाली कॅम्प) हा अल्पवयीन मुलीसोबत अश्लील अवस्थेमध्ये एका खोलीत आढळून आले होते. याबाबत वडिलांनी जाब विचारला असता, मुलीने संशयित आदित्य लग्न करणार असल्याचे सांगितले. त्या वेळी त्याच्याकडे विचारणा केली असता, त्याने मुलीशी विवाह करण्यास नकार दिला. या घटनेनंतर दुसऱ्या दिवशी अल्पवयीन मुलीने राहत्या घरात गळफास घेत आत्महत्या केली होती. याप्रकरणी आदित्यविरुद्ध बलात्कार, पोस्कोसह आत्महत्येस प्रवृत्त केल्याचा गुन्हा दाखल करण्यात आला आहे. महिला उपनिरीक्षक टी. एस. पवार पुढील तपास करीत आहेत.