Nashik Farmer Protest : अहमदनगर जिल्ह्यातील निळवंडे धरणातील पाणी सिन्नर तालुक्यातील लाभक्षेत्रातील गावांना मिळावे या मागणीसाठी आज मुंबई-नागपूर समृद्धी महामार्गावर सिन्नरच्या पूर्व भागातील शेतकऱ्यांनी आंदोलन केले. (road Stop on samruddhi mahamarg of farmers of Sinnar for water of Nilwande nashik news)

अहमदनगर जिल्ह्यातील देवकवठे, सिन्नर तालुक्यातील मलढोन, सायाळे, दुसंगवाडी, पाथरे खुर्द पाथरे बुद्रुक व वारेगाव येथील शेतकरी या आंदोलनात सहभागी झाले होते. जलसंपदा विभागाने सिन्नर तालुक्यातील गावांसाठी नदी मार्गाने पाणी सोडले होते. मात्र हे आवर्तन पाथरे वारेगाव पर्यंत देण्याची शेतकऱ्यांची आग्रही मागणी आहे. तालुका यावर्षी दुष्काळाचा सामना करतो आहे.

निळवंडे च्या पाण्यामुळे किमान पूर्व भागातील जनावरांचा व काही अंशी शेती सिंचनाचा प्रश्न मार्गी लागेल यामुळे शेतकरी आवर्तनासाठी आक्रमक झाल्याचे बघायला मिळाले. मुंबई-नागपूर समृद्धी महामार्गावर सायाळे शिवारात शेकडोच्या संख्येने एकत्र येत शेतकऱ्यांनी समृद्धी महामार्गावरची वाहतूक रोखून धरली.

सव्वाशे ते दीडशे शेतकरी या आंदोलनात सहभागी झाले होते. सकाळी सव्वा अकरा ते सव्वा बारा दरम्यान रास्ता रोको करण्यात आला. नाशिक ग्रामीण पोलीस दलाकडून वावी पोलिसांच्या मदतीला सिन्नर आणि एमआयडीसी पोलीस ठाण्यातील कुमक पाठवण्यात आली. तसेच दंगा नियंत्रण पथकाची विशेष प्लाटून देखील आंदोलन स्थळी दाखल झाली होती.

या आंदोलनाची नाशिकचे जिल्हाधिकारी तसेच जिल्हा पोलीस अधीक्षकांना माहिती देण्यात आली. निळवंडे प्रकल्पाचे व जलसंपदा विभागाचे अधिकारी आंदोलन स्थळी आल्यावर झालेल्या चर्चेनंतर शेतकऱ्यांनी समृद्धी महामार्ग सोडला.

वावी पोलीस ठाण्याचे सहाय्यक निरीक्षक चेतन लोखंडे यांनी जलसंपदा विभागाच्या अधिकाऱ्यांना व शेतकऱ्यांना समन्वयातून मार्ग काढावा, महामार्गावरची वाहतूक रोखून धरू नये असे आवाहन केले होते.