नाशिक : पाच वर्षांच्या तुलनेत नाशिकमध्ये स्री जन्मदरात या वर्षाच्या पहिल्या सहा महिन्यांत घट झाल्याचे दिसून येत आहे. हजार मुलांमागे पहिल्या सहा महिन्यांत ९०२ मुलींचा जन्म झाल्याचे वैद्यकीय विभागाच्या अहवालातून स्पष्ट झाले आहे.

स्त्री जन्मदरात वाढ व्हावी म्हणून शासनातर्फे मोठ्या प्रमाणात जनजागृती केली जाते. विशेष म्हणजे स्त्रीभ्रूणहत्या रोखण्यासाठी विशेष प्रयत्न केले जात आहेत. ‘सुकन्या योजना’, ‘माझी कन्या भाग्यश्री’, ‘बेटी पढाओ-बेटी बचाओ’ यांसारख्या योजनांच्या माध्यमातून मुलींचा जन्मदर वाढविण्यासाठी प्रवृत्त केले जाते. गर्भलिंग चाचणी केल्यास कठोर दंडात्मक कारवाई केली जाते. असे असले तरी मुलींच्या जन्मदरात या वर्षी घट झाल्याचे अहवालातून स्पष्ट झाले आहे.

हजार मुलांमागे मुलींच्या जननदराचे प्रमाण असे-

२०१७ मध्ये ९०७ मुलींच्या जन्मदराचे प्रमाण होते. २०१८ मध्ये मुलींची संख्या ९२३ तर २०१९ मध्ये ९२० नोंदविली गेली. २०२० मध्ये ९१२ तर २०२१ मधील पहिल्या सहा महिन्यांतील प्रमाण ९०२ पर्यंत खाली आले आहे. अर्थात डिसेंबरअखेरच्या आकडेवारीवरून मुलींच्या जन्माचा वार्षिक टक्का घसरला की नाही, हे स्पष्ट होणार असले तरी पहिल्या सहा महिन्यांत मात्र टक्का घसरल्याचे स्पष्ट दिसून येते.

वर्षनिहाय स्री-पुरुष जन्म

वर्ष स्त्री पुरूष

२०१७ १०,६१९ ११,७०१

२०१८ १३,३७६ १४,४८२

२०१९ २०,२६४ २२,०२१

२०२० १९,५५३ २२,६७१

जून २०२१ ४,३६८ ४,८४४