वनोली (जि. नाशिक) : येथे काल सायंकाळी अंगावर भिंत कोसळल्याने विवेक मंगेश भामरे (वय -१५) या युवकाचा जागीच मृत्यू झाला.

गत तीन दिवसापासून पाऊस झाल्याने घराच्या भिंती ओल्या झाल्या. घरात अभ्यास करत असलेला युवक भीतीला पाठ टेकून बसलेला असताना अचानक भिंत अंगावर कोसळल्याने त्याचा जागीच मृत्यू झाला. मंगेश भामरे यांनी एकुलता एकच मुलगा असल्याने परिसरात हळहळ व्यक्त होत आहे.

दुसऱ्या ठिकाणी घराचे काम सुरु असल्यामुळे आई वडील त्या ठिकाणी होते. घरात विवेक एकटाच अभ्यास करत होता.घराची भिंत कोसळल्याचा आवाज आल्याने शेजारील आजी आजोबा व काका यांनी लगेच धाव घेतली. घरातील वीजपुरवठा बंद झाल्यामुळे अंधारात विवेक ढिगाऱ्यात अडकल्याचे दिसून आले नाही. अर्ध्या तासाने आई वडील जेव्हा घरी पोहोचले तेव्हा त्यांनी विवेकचा तपास केला.

विवेक कुठेच आढळून न आल्यामुळे भिंतीचा ढिगारा बाजूला केला असता विवेकचा मृतदेह तिथे आढळून आला. विवेकचा मृतदेह बघून आई वडील व शेजारी राहणाऱ्या आजी आजोबा व काकाने एकच हंबरडा फोडला. त्यास तत्काळ सटाणा येथील ग्रामीण रुग्णालयात दाखल केले असता डॉक्टरांनी त्यास मृत घोषित केले. आई वडील यांच्यासाठी म्हातारपणात आधार असणाऱ्या विवेकचा मृत्यू झाल्यामुळे परिसरात हळहळ व्यक्त केली जात आहे. आज सकाळी सटाना येथील ग्रामीण रुग्णालयात विवेकचे शव विच्छेदन करण्यात आले व ११ वाजता अंत्यविधी करण्यात आला.