यवतमाळ : दिवसेंदिवस करोनाची दहशत वाढत चालली आहे. आतापर्यंत दूरवर असलेल्या करोनाने आता विदर्भात्ही हातपाय पसरायला सुरुवात केली आहे. करोना विषाणूचा (Coronavirus) संसर्ग झालेल्या पुण्यातील प्रवाशांबरोबर यवतमाळ जिल्ह्यातील 9 जणांनी प्रवास केल्याचं उघडकीस आल्यानं यवतमाळ जिल्ह्यातील आरोग्य आणि प्रशासकीय यंत्रणा खडबडून जागी झाली आहे. या सर्व 9 जणांना घरातून बाहेर न पडण्याच्या सूचना देण्यात आल्या आहेत. तीन कुटुंबातील 10 जण फिरण्यासाठी दुबईला गेले होते ते सर्व तिथून 1 मार्चला ते परत आले. त्यातील एका तरुण व्यक्तीवर पुण्याच्या रुग्णालयात उपचार सुरू आहे तर त्याच्या सोबत प्रवास करणारे इतर 9 जण सध्या यवतमाळ जिल्ह्यात आपापल्या घरी असून त्यांच्यावर आरोग्य विभाग लक्ष ठेवून आहे. या सर्वांमुळे अनेकांच्या चिंतेत भर पडली आहे.
नागरिकांनी स्वच्छता राखावी आणि योग्य ती काळजी घ्यावी अशा सूचना जिल्हा शल्य चिकित्सक यवतमाळ यांनी दिल्या आहेत. नागरिकांनी अनावश्‍यक प्रवास टाळावा. गर्दीच्या ठिकाणी जाणे टाळावे. असेही सांगण्यात येत आहे.

सविस्तर वाचा - दारूच्या नशेत भाऊ चाकू घेऊन धावला आईच्या मागे, तेवढ्यात लहान भावाने केले हे...

घरी निगरणीत
सध्या सर्वत्र कोरोनाने भीती निर्माण केली आहे. प्रत्येकजण दुसऱ्याकडे संशयाने बघत असल्याचे चित्र सर्वत्र दिसते. अशातच बाहेर देशातून जिल्ह्यात आलेल्या तिघांवर संशयातून पाळत ठेवण्यात येत आहे. हे तिघेही त्यांच्या घरी असून त्यांच्यावर लक्ष ठेवण्यात येत असल्याची माहिती आरोग्य विभागाकडून देण्यात आली आहे.
साऊथ कोरिया येथे शिक्षणासाठी असलेला युवक होळीकरिता वर्ध्यात आला. बाहेर देशातून आल्यामुळे त्याला त्याच्याच घरी निगरणीत ठेवण्यात आले आहे. इराणच्या मसद येथून हिंगणघाट आणि कारंजा येथे आलेल्या युवकांवरही सावधगिरी म्हणून लक्ष ठेवण्यात येत असल्याची माहिती आरोग्य विभागाकडून देण्यात आली आहे.
जिल्ह्यात या आजाराचा एकही रुग्ण नसून केवळ सुरक्षेच्या दृष्टीने उपाय योजना म्हणून बाहेर देशातून आलेल्या व्यक्तीवर लक्ष ठेवण्यात येत आहे.