भंडारा ः मेहुणीच्या मानेवर व डोक्‍यावर कोयत्याने वार करून तिचा खून केल्याप्रकरणी आरोपीला जिल्हा व सत्र न्यायालयाने आजीवन सश्रम कारावास व १० हजार रुपये दंडाची शिक्षा सुनावली. सोमेश्‍वर कचरू दिघोरे (रा. उमरी, ता. पवनी) असे आरोपीचे नाव आहे.

३ फेब्रुवारी २०१६ रोजी तक्रारदार लीला राजकुमार डहारे (रा. तळोधी बाळापूर, जि. चंद्रपूर) हिने पवनी पोलिसात दिलेल्या तक्रारीनुसार, ती लग्नाच्या कार्यक्रमासाठी माहेरी आली होती. वडिलांच्या घराच्या मागे तिचा चुलतभाऊ विजय मनोहर दिघोरे पत्नी किरणसह राहत होता. तसेच दुसरा चुलतभाऊ आरोपी सोमेश्‍वर कचरू दिघोरे हा गावातच आबादी प्लॉटवर पत्नी बालीसह राहत होता. 

हेही वाचा - यवतमाळमध्ये पूजा अरुण राठोडचा गर्भपात; डॉक्टर आठ दिवसांपासून गायब ?

आरोपीची पत्नी बाली व आणि दुसऱ्या भावाची पत्नी किरण या दोघी बहिणी आहेत. आरोपी सोमेश्‍वर पत्नी बालीसोबत नेहमी भांडण करून तिला मारहाण करायचा. ही बाब बाली बहीण किरणला सांगायची. त्यामुळे सोमेश्‍वर किरणचा राग करीत होता. त्याने तिच्यासोबत भांडणही केले होते. अशातच सोमेश्‍वरची पत्नी बाली त्याच्या त्रासाला कंटाळून भुयार येथे नातेवाइकांकडे गेली होती. 

३ फेब्रुवारी २०१८ ला दुपारी लीला डहारे हीला किरणच्या ओरडण्याचा आवाज आला. तिने जाऊन पाहिले असता आरोपी सोमेश्‍वर किरणला कोयत्याने मारत असल्याचे दिसले. किरणच्या मानेवर व डोक्‍यावर गंभीर मार लागल्याने तिचा नागपूर येथे रुग्णालयात ४ जून २०१८ ला मृत्यू झाला होता. पवनी पोलिसांनी गुन्हा दाखल करून तपासाला सुरुवात केली. आरोपीविरुद्ध दोषारोपपत्र जिल्हा व सत्र न्यायालय भंडारा येथे दाखल केले होते. न्यायालयाने मंगळवारी (ता.१६) पुराव्यांच्या आधारे आरोपी सोमेश्‍वरला आजन्म सश्रम कारावास व ५ हजार रुपये दंड, तसेच कलम ४४९ अन्वये १० वर्षे सश्रम कारावास व ५ हजार रुपये दंडाची शिक्षा सुनावली.