सेलू (जि. वर्धा) : गेल्या अनेक वर्षांपासून बंद असलेल्या कंपनीतून सेलडोहकडे कालवा जातो. त्या परिसरात नामदेव चचाणे हे शेळ्या चारण्यासाठी गेले. त्यावेळी कालव्याच्या दिशेने जाताच पाण्यात कुत्रासदृश्य प्राणी दिसला. जवळ जाऊन बघताच तो बिबट असल्याचे समजले. रविवारी ही घटना घडली असून त्यामुळे खळबळ माजली होती.

हेही वाचा - वाढदिवसाला नातेवाईक बसले जेवायला; बॉक्स उघडताच सरकली पायाखालची जमीन

नामदेव यांनी कालव्यात डोकावून पाहण्याची हिम्मत केली. त्यानंतर बिबट्याच्या हालचाली दिसल्या नाहीत. त्यामुळे बिबट्याचा मृत्यू झाला असावा, असे त्यांना वाटले. त्यांनी लगेच याची माहिती कंपनीच्या सुरक्षा रक्षकाला दिली. त्याने वनविभागाशी संपर्क साधून माहिती दिली. माहिती मिळताच वनविभागाचे सेलू येथील क्षेत्र सहायक डी. आर. पाटील, क्षेत्र सहायक केळझर एन. के. पाचपोर, कोल्हे, मानव वन्यजीव रक्षक कौशल मिश्रा, वनरक्षक खेलकर, चोरे, धोंगडे, बकावटे, बावणे हे घटनास्थळी पोहोचले. मृत्यू झाल्याची खात्री पटताच त्यांनी पंचनामा केला. 

हेही वाचा - '...तर काँग्रेस अन् राष्ट्रवादीमधील अर्धे नेते तुरुंगात जातील'

पशुधन विकास अधिकारी डॉ. प्रशांत वरभे, डॉ.प्रकाश भिसेकर व डॉ. संजय खोपडे यांनी बिबट्याचे शवविच्छेदन केले. त्यांच्या म्हणण्यानुसार, या बिबट्याचा मृत्यू एक दिवसाआधी झाला असावा. यावेळी उपस्थित वनसंरक्षक तेंदू व वन्यजीव अधिकारी ठाकूर यांनी या बिबट्याचा मृत्यू उपासामुळे झाल्याचा अंदाज व्यक्‍त केला आहे. फिरते पथकाच्या वनपरिक्षेत्र अधिकारी गायत्री सोनोने यांनीही घटनास्थळी भेट दिली. घटनास्थळीच बिबटावर अंत्यसंस्कार करण्यात आले.