नेर : शहरातील हनुमाननगरातील रहिवासी असलेल्या एका तरुणाचा गळा आवळून खून केल्याचे आज शनिवारी (ता.29) दुपारी 12 वाजता लासीना ते घुई शिवारात उघडकीस आले. हा तरुण काल शुक्रवारी (ता.28) सायंकाळी साडेसातला मित्राला भेटण्यासाठी जात असल्याचे आईला सांगून घरून निघाला होता.

याबाबत नेर पोलिस ठाण्यात खुनाचा गुन्हा दाखल करण्यात आला आहे. योगेश शालिकराव भोंडे (वय 27, रा. हनुमाननगर, नेर) असे मृत तरुणाचे नाव आहे. योगेश हा काल शुक्रवारी सायंकाळी साडेसात वाजता मित्राला भेटण्यासाठी जात असल्याचे आईला सांगून घरातून निघाला होता. मात्र, आज शनिवारी दुपारी 12 वाजता योगेशचा मृतदेह लासिना ते घुई शिवारात रस्त्याच्या कडेला स्थानिक नागरिकांना दिसला.

स्थानिकांनी ही माहिती लाडखेड पोलिसांना दिली. त्यानंतर दारव्हा येथील उपविभागीय पोलिस अधिकारी आदित्य मिरखेलकर, लाडखेडचे ठाणेदार रामकृष्ण भाकडे, नेरचे प्रभारी ठाणेदार बबन कराळे हे घटनास्थळावर दाखल झालेत. यावेळी रस्त्याच्या कडेला आढळून आलेल्या मृताच्या गळ्यावर दोरीच्या खुणा व छातीवरही जखमांच्या खुणा आढळून आल्या. चेहऱ्यावर रक्ताचे डाग व शर्ट पूर्णतः फाटल्याने ही आत्महत्या नसून, खून असल्याचा संशय पोलिसांना आला. घटनास्थळाच्या पंचनाम्यावरून लाडखेड पोलिसांनी अज्ञात आरोपींविरोधात खुनाचा गुन्हा दाखल केला आहे. याबाबतचा पुढील तपास पोलिस करीत आहेत.

सोळा तासांपूर्वी निघाला घरून

योगेश भोंडे हा शांत व संयमी होता. मित्रांचा गोतावळा फार कमी असल्याने त्याचा इतरांशी संपर्क जास्त नव्हता. शुक्रवारी सायंकळी साडेसात वाजता तो त्याच्या आईला ‘एका मित्राला भेटून येतो’, असे सांगून घराबाहेर पडला. मा,त्र रात्रीपर्यंत तो घरी परतला नसल्याने घरच्यांची चिंता वाढली. घरच्यांनी रात्रीच नातेवाईक व मित्रमंडळीकडे सर्वत्र शोध घेणे सुरू केले. मात्र, शनिवारी दुपारी 12 वाजेच्या दरम्यान लासीना ते घुई शिवारात रस्त्याच्या कडेला त्याचा मृतदेह (dead body)आढळून आला. त्यामुळे योगेशच्या खुणा मागे कोण व खुनाचा कारण नेमके काय, हे शोधण्याचे आव्हान नेर(ner) पोलिसांसमोर आहे.