MBBS Paper Leak: महाराष्ट्र आरोग्य विज्ञान विद्यापीठाने बुधवारी (ता. आठ) घेतलेला एमबीबीएसचा अंतिम पेपर फुटल्याचे वृत्त आल्याने ऐनवेळी पेपर बदलविण्यात आला. त्यामुळे परीक्षा पाऊणतास उशिराने सुरू करण्यात आल्याने विद्यार्थ्यांना मनस्ताप सहन करावा लागला.

एमबीबीएसच्या प्रथम वर्षाचा आज (ता. आठ) शेवटचा पेपर होता. या पेपरला चांगलाच गोंधळ उडाला. निर्धारित वेळापत्रकानुसार पेपर न घेता तब्बल पाऊणतास उशिराने परीक्षा सुरू करण्यात आली. अमरावतीसह नागपूर येथील परीक्षा केंद्रांवर हा प्रकार घडला. यासंदर्भात माहिती देण्यास स्थानिक परीक्षा केंद्राधिकाऱ्यांनी नकार दिला. मात्र मिळालेल्या माहितीनुसार ‘बायोकेमेस्ट्री’ विषयाचा दुसरा व अभ्यासक्रमातील अंतिम थेअरी पेपर होता.

पहिला थेअरी पेपर सोमवारी (ता. सहा) झाला. यावेळी द्वितीय पेपर एका परीक्षा केंद्रावर वितरित केल्या गेला. हा प्रकार लक्षात येताच तो विद्यार्थ्यांकडून परत घेण्यात येऊन पहिला पेपर देण्यात आला. मात्र, बुधवारी (ता. आठ) असलेला पेपर सोमवारीच वितरित झाल्याने तो लीक झाला असावा, असा संशय वाढला होता.

दरम्यान, ही सूचना इतर परीक्षा केंद्रांना नसल्याने तेथे बुधवारी तोच पेपर विद्यार्थ्यांना देण्याची तयारी झाली होती. यादरम्यान वरिष्ठ पातळीवरून जुना (सोमवार सहा नोव्हेंबरला दिलेला) पेपर न देण्याचे आदेश आल्याने व नवीन पेपरसेट त्यावेळी केंद्रांवर उपलब्ध नसल्याने परीक्षार्थींना प्रश्नपत्रिकेसाठी ताटकळण्याची वेळ आली.(Latest Marathi News)

तब्बल पाऊणतासाने प्रश्नपत्रिकेचा दुसरा व नवीन सेट आल्यानंतर तो वितरित करण्यात आला. त्यामुळे परीक्षा विलंबाने सुरू झाली.अमरावतीमधील वैद्यकीय अभ्यासक्रमांच्या प्रथम वर्षाच्या विद्यार्थ्यांना दोन केंद्रे होती. दोन्ही केंद्रांवरील केंद्राधिकाऱ्यांनी व महाविद्यालयीन प्राचार्यांनी यासंदर्भात माहिती देण्यास स्पष्ट नकार दिला. एका केंद्रावर परीक्षाच नसल्याचे तर दुसऱ्या केंद्रावर विद्यार्थ्यांना सुट्या लागल्या असल्याचे कारण सांगण्यात आले. (Latest Marathi News)