Monk Attacked Woman with Trident: चिखलदरा पोलिस ठाण्याच्या हद्दीत येणाऱ्या वस्तापूर गावात मांगेलाल बेठेकर (वय ७५, रा. दुणी, ता. धारणी) या बाबाने भिक्षा न दिल्यामुळे ठकीबाई सोनूजी हेकडे या ६० वर्षीय वृद्ध महिलेच्या पोटावर त्रिशुळाने वार करीत त्यांना जखमी केल्याने चांगलीच खळबळ उडाली आहे. संतप्त ग्रामस्थांनी या बाबाला गावातील मुख्य चौकातील एका विजेच्या खांबाला बांधून ठेवले व पोलिस पाटलांना या घटनेची माहिती देण्यात आली.

रविवारी श्रीसंत गजानन महाराजांचा पालखी उत्सव, भजनकीर्तन असा कार्यक्रम पहाटे पाच वाजतापासून चिखलदरा तालुक्यातील वस्तापूर या गावात सुरू होता. दुपारपर्यंत सर्व गावकरी व भक्तगण श्रीसंत गजानन महाराजांच्या कार्यक्रमात व्यस्त होते.

नेमके याच वेळेत दुपारी तीन वाजताच्या सुमारास मांगेलाल बेठेकर हा बाबा हातात त्रिशुळ तर बगलेत मोठे गाठोडे घेऊन गावात भिक्षा मागत होता. भिक्षा मागत असताना गावातील सोनूजी हेकडे यांच्या घरी बाबा पोहोचला व भिक्षेची तसेच पैशाची मागणी केली असता ठकूबाईने बाबाला भिक्षा दिली, पण दिलेल्या भिकेत पैसे न दिल्यामुळे बाबाचे समाधान झाले नाही. (Latest Marathi News)

त्यामुळे महिलेसोबत त्याने वाद घातला व रागाच्या भरात त्याने जवळ असलेल्या त्रिशूलने महिलेच्या पोटावर वार करून जखमी केले. या घटनेने गावात चांगलीच खळबळ उडाली. नागरिकांनी या महिलेला तत्काळ टेम्ब्रूसोंडा येथील आरोग्यकेंद्रात नेऊन उपचार केले. दरम्यान, ग्रामस्थांनी या बाबाला गावातील मुख्य चौकात असलेल्या खांबाला कापडाच्या साह्याने बांधून ठेवले व पोलिसांना पाचारण केले.

चिखलदरा पोलिसांनी बाबाला ताब्यात घेतले. महिलेच्या तक्रारीनंतर बाबावर कार्यवाही करण्यात येईल, असे पोलिसांनी सांगितले. या घटनेचा तपास पीएसआय सुरेश राठोड व जमादार प्रभाकर चव्हाण करीत आहेत. (Latest Marathi News)