Nagpur Cyber Crime: जरीपटका पोलिस ठाण्याच्या हद्दीत असलेल्या ३४ वर्षीय महिलेला शेअर्सच्या खरेदी-विक्रीमध्ये अधिक नफा देण्याचे अमिष दाखवत २४ लाखांनी गंडवले. याप्रकरणी सायबर पोलिसांनी तीन आरोपीविरोधात गुन्हा दाखल केला आहे.

पोलिसांनी दिलेल्या माहितीनुसार, ६ नोव्हेंबरला जरीपटका हद्दीत राहणाऱ्या महिला घरी असताना, त्यांच्या मोबाइलवर आलेल्या जाहिरातीवर ‘लिंक मोर’ हे ऑप्शन क्लिक केले. त्यानंतर या महिलेला जेसिका नावाच्या महिलेने ‘आयआयएफएल सर्व्हीस ग्रुप ११७’ नावाच्या एका ग्रुपमध्ये ॲड केले.

या ग्रुपमध्ये असलेल्या इतर दोघांनी त्यांना शेअर बाजारात ट्रेडिंग आणि लर्निंगसाठी जाहिरात दाखवित, त्यांचा विश्‍वास संपादन केला. त्यानंतर त्यांना ‘बी६६ ब्लॅकरॉक स्टॉक्स पुल अप’मध्ये सहभागी करून घेत, त्यांना खरेदी विक्रीमधून अधिक लाभ देण्याचे आमिष दाखविले. यानंतर त्यांना बनावट लिंक पाठवून त्या माध्यमातून २४ लाख ४८ हजाराची विविध शेअर्सच्या नावे गुंतवणूक करून घेतली. (Latest Marathi News)

मात्र, त्यांना अधिकचा लाभांश मिळत नसल्याने त्यांनी विचारणा केली असता, त्यांनी बोलणे बंद करीत गुंतवणूक केलेली रक्कमही परत केली नाही. त्यामुळे याबाबत त्यांनी सायबर सेलला तक्रार दिल्यावर पोलिसांनी आयटी ॲक्ट अन्वये गुन्हा नोंदवून आरोपींचा शोध सुरू केला आहे.