अमरावती - अंजनगावसुर्जी ठाण्याच्या हद्दीतील एका घटनेत अल्पवयीन मुलीला ज्यूसमधून बेशुद्धीचे औषध पाजून तिच्यावर बळजबरीने अत्याचार करण्यात आला, असा गंभीर आरोप पीडितेने तक्रारीत केला. त्याआधारे पोलिसांनी युवकाविरुद्ध अत्याचार, विनयभंगासह बाललैंगिक अत्याचार प्रतिबंधक कायद्यान्वये गुन्हा दाखल केला.

स्वप्नील भुजंगराव रोकडे (वय ३२, रा. धनेगाव), असे अत्याचाराचा गुन्हा दाखल झालेल्या संशयित युवकाचे नाव असल्याचे पोलिसांनी सांगितले. स्वप्नीलचे पीडित अल्पवयीन मुलीच्या घरी येणे-जाणे होते. त्यातून त्याची ओळख अल्पवयीन मुलीसोबत झाली. ऑगस्ट २०२२ मध्ये संशयिताने त्याच्या आईवडिलांची प्रकृती ठीक नसल्याचे कारण सांगून तिला गावी नेण्याचा बहाणा करून स्वत:च्या दुचाकीवर बसवून नेले.

रस्त्यात दोघेही एका ज्यूस सेंटरवर थांबले. त्याठिकाणी त्यांनी ज्यूस घेतला. ज्यूस पिताच अल्पवयीन मुलगी बेशुद्ध पडली. त्यानंतर तिला संशयित स्वप्नीलने एका लॉजवर नेऊन तिच्यावर बळजबरीने अत्याचार केला. ही बाब ती शुद्धीवर आल्यानंतर मुलीच्या लक्षात आली. सदर घटनेबाबत कुणाला सांगितल्यास पीडितेला तसेच आईवडिलांना मारून टाकण्याची धमकी त्याने मुलीस दिली.

त्यानंतर १८ मार्च २०२३ रोजी पीडित मुलीस संशयित स्वप्नीलने सातेगाव फाट्यावर असताना लग्न न केल्यास आईवडिलांना मारण्याची धमकी दिली होती. सतत वाढत्या दबावामुळे पीडितेने घटनेची माहिती आपल्या आईवडिलांना दिली. त्यांनी समजूत काढण्याचा प्रयत्न केला असता, संशयित स्वप्नील रोकडेने त्यांनाही धमकी दिली, असा आरोप पीडित मुलीने तक्रारीत केला. त्याआधारे अंजनगावसुर्जी पोलिसांनी संशयित युवकाविरुद्ध गुन्हा दाखल केला आहे.